ដល់ពេលរវល់ហើយ! Liverpool កំពុងដាក់សំណើខ្ចីជើងខ្សែប្រយុទ្ធម្នាក់ទៀតពី Barcelona

អង់គ្លេស៖ ខណៈដែលទីផ្សារដោះដូរកីឡាកររដូវក្ដៅនេះជិតឈានដល់ថ្ងៃបិទបញ្ចប់នោះ Liverpool ហាក់ដូចជាមានភាពមមាញញឹកជាងគេក្នុងការនាំយកកីឡាករចំណូលថ្មីមករួមក្រុម ពោលថ្មីៗនេះទើបតែទិញបានខ្សែបម្រើ Thiago Alcantara ពីក្លិប Bayern Munich និង ខ្សែប្រយុទ្ធ Diogo Jota ពីក្លិប Wolves ។

លើសពីនេះ Liverpool ក៏កំពុងតែដាក់សំណើមួយផ្សេងទៀតទៅកាន់ក្លិប Barcelona ដើម្បីខ្ចីជើងខ្សែប្រយុទ្ធធ្លាក់កូដ Ousmane Dembele មួយរដូវកាល។ គួរឲ្យដឹងដែរថាលោក Jurgen Klopp កំពុងតែព្យាយាមពង្រឹងតំបន់ប្រយុទ្ធរបស់ Liverpool បន្ថែមនៅរដូវកាលថ្មីនេះ ហើយលោកមើលឃើញថា Dembele មានសមត្ថភាពគ្រប់គ្រាន់ក្នុងការជួយបំពេញចំណុចខ្វះខាតរបស់ក្រុមបាន ទាំងល្បឿននិងបច្ចេកទេស។ 

ដោយឡែកសម្រាប់ភាគីក្លិប Barcelona វិញមិនទាន់ធ្វើការឆ្លើយតបណាមួយនៅឡើយទេចំពោះសំណើមួយនេះ។ ជាមួយគ្នានេះដែរក្លិបយក្សតំបន់កាតាឡាន់ ហាក់ដូចជាមិនចង់ឲ្យ Dembele ចាកចេញក្នុងកិច្ចសន្យាខ្ចីជើងបែបនេះនោះទេ ពោលចង់លក់រូបគេផ្តាច់កុងត្រាតែម្តង។ យ៉ាងណាមិញបន្ទាប់ពីមានរបួសតាមរំខានមិនចេះចប់មិនចេះហើយនៅក្នុងរដូវកាលមុននេះ Dembele អាចចូលលេងបានធម្មតាវិញហើយសម្រាប់រដូវកាលថ្មីនេះ៕

ប្រភព៖ sport