ប្អូន Hazard ស៊ុតហ្វ្រីឃីកកោងស្អាតណាស់យប់មិញ! Dortmund ហូបក្រុម Duisburg ៥-០ ក្នុងការប្រកួតបើកឆាកពាន DFB-Pokal (មានវីដេអូ)

អាល្លឺម៉ង់៖ ក្រុម Borussia Dortmund នៅតែបន្តបង្ហាញទម្រង់លេងបានល្អ ជាក់ស្ដែងកាលពីរាត្រីថ្ងៃច័ន្ទម្សិលមិញ ពួកគេបានលត់ក្រុមម្ចាស់ផ្ទះ Duisburg យ៉ាងចាស់ដៃដោយលទ្ធផល៥ទល់នឹង០ឯណោះ ក្នុងការប្រកួតជុំទី១ ពានរង្វាន់ DFB-Pokal (ឬ German Cup )។

គិតត្រឹមតង់ទី១ ក្រុម Dortmund ស៊ុតនាំមុខមុន៣គ្រាប់ ដោយគ្រាប់ទី១ ជាការស៊ុតបាល់ពន័យ១១ម៉ែត្ររបស់គោលដៅក្រុម Man UTD កីឡាករ Jadon Sancho ចំណែកឯគ្រាប់ទី២ រកបានដោយខ្សែបម្រើវ័យក្មេងចំណូលថ្មី Jude Bellingham រីឯគ្រាប់ទី៣ ជាការលើកបាល់ហ្វ្រីឃីកបញ្ចូលទីយ៉ាងអស្ចារ្យពីសំណាក់ប្អូនប្រុសបង្កើតរបស់ Hazard គឺកីឡាករ Thorgan Hazard។

ដោយឡែក២គ្រាប់ទៀត ធ្វើបាននៅតង់ទី២ សម្រេចទីដោយខ្សែបម្រើ Giovanni Reyna និងម្ចាស់អាវលេខ ១១ Marco Reus។

គួរឲ្យដឹងដែរថា ក្រោយរកបាន១គ្រាប់កាលពីយប់មិញ បានធ្វើឲ្យខ្សែបម្រើ Bellingham ក្លាយជាកីឡាករវ័យក្មេងជាងគេ ដែលទាត់បញ្ចូលទីឲ្យក្រុមឈុតធំរបស់ Dormund ពោលគឺក្នុងវ័យ១៧ឆ្នាំនិង៧៧ថ្ងៃ៕

បើចង់ឃើញការស៊ុតបញ្ចូលទីអស្ចារ្យយ៉ាងណានោះ សូមទស្សនាវីដេអូខាងក្រោម៖