ក្រោយបានកាតក្រហមយប់មិញ Neymar ថាស្ដាយណាស់ អត់បានដាល់ឲ្យចូលកណ្ដាលមុខ Gonzalez

បារាំង៖ ក្លិប Paris Saint-Germain បានភ្លាត់ចាញ់ក្រុម Marseille ក្នុងទឹកដីរបស់ខ្លួន ១ទល់នឹង០ កាលពីរាត្រីថ្ងៃអាទិត្យម្សិលមិញ។ យ៉ាងណាមិញ ក្នុងការប្រកួតនេះ ឃើញថា ក្រុមទាំងពីរមានប៉ះទង្គិចគ្នាច្រើន ជាពិសេសនៅចុងម៉ោង ជាក់ស្ដែងអាជ្ញាកណ្ដាល ចាយកាតក្រហមអស់ដល់ទៅ៥សន្លឹកឯណោះ។

ក្នុងនោះអ្នកដែលត្រូវពិន័យដេញចេញពីទីលាន ក៏មានវត្តមានម្ចាស់អាវលេខ១០ ក្រុម PSG កីឡាករ Neymar ផងដែរ ក្រោយរូបគេបានបង្កជម្លោះជាមួយនឹងខ្សែការពារក្រុម Marseille កីឡាករ Alvaro Gonzalez។

ជាមួយគ្នានេះ បើតាមកាសែត France Football News កីឡាករ Neymar បានបង្ហើបប្រាប់ថា មូលហេតុដែលគេមិនអាចទប់អារម្មណ៍ខ្លួនឯងបាន គឺដោយសារតែ​ កីឡាករ Gonzalez បានប្រើពាក្យមិនសមរម្យមកលើខ្លួន បែបរើសអើង ដោយនិយាយថា “បិទមាត់ទៅ ស្វាសំអុយ”។

យ៉ាងណាមិញ ក្រោយបញ្ចប់ការប្រកួត Neymar ក៏បានបង្ហោះនៅលើកគណនី​ Twitter ថា ការទទួលបានកាតក្រហមមិនបានធ្វើឲ្យខ្លួនស្ដាយក្រោយនោះទេ តែអ្វីដែលគេសោកស្ដាយបំផុតនោះ គឺមិនបានដាល់ឲ្យចំមុខរបស់ Gonzalez ៕

ប្រភព៖ AF