ដោយសារតែប្រាក់ពលកម្មថ្លៃពេក ទើបធ្វើឲ្យ Juventus និង Inter ពិបាកយកខ្សែការពារឆ្នើមរបស់ R. Madrid រូបនេះមកលេងនៅ Serie A

បរទេស៖ បើតាមគេហទំព័រ AS បានឲ្យដឹងថាក្លិប Juventus និង​ Inter Milan បានធ្វើការដាក់សំណើទៅក្លិប Real Madrid ក្នុងគោលបំណងនាំយកកីឡាករខ្សែការពារ Marcelo មកលេងនៅ Serie A ។ ប៉ុន្តែដោយសារតែប្រាក់ពលកម្មកីឡាករវ័យ៣២ឆ្នាំរូបនេះថ្លៃពេកទើបធ្វើឲ្យក្លិបអ៊ីតាលីទាំងពីរនេះស្ទាក់ស្ទើរមិនហ៊ានសម្រេចចិត្ត ពោល Marcelo សុីថ្លៃដល់ទៅ៨លានអឺរ៉ូ (ឬប្រមាណ៩លានដុល្លារ) ក្នុងមួយរដូវកាល។

គួរឲ្យដឹងថាចាប់តាំងពី Real Madrid ទិញយកកីឡាករ Ferland Mendy មករួមក្រុមកាលពីរដូវកាលមុននេះ Marcelo មិនសូវបានបង្ហាញខ្លួនជាជម្រើសទី១ឲ្យលោក Zinedine Zidane ដូចរដូវកាលមុនៗនោះទេ ពោលភាគច្រើនបានត្រឹមអង្គុយជាកីឡាករបម្រុង។ យ៉ាងណាមិញ នៅក្នុងរយៈពេលជាង១០រដូវកាលចុងក្រោយនេះ Marcelo ដើរតួយ៉ាងសំខាន់នៅតំបន់ការពារស្លាបឆ្វេងរបស់ Real Madrid ពោលរូបគេអាចឈ្នះពានសរុបជាមួយក្លិបយក្សអេស៉្បាញមួយនេះបានដល់ទៅ ២២គ្រឿងឯណោះ៕ 

ប្រភព៖ as