តេហេរ៉ង់៖ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា ប្រទេសអ៊ីរ៉ង់បានចាប់ផ្តើមធ្វើសមយុទ្ធយោធាប្រចាំរយៈពេល ៣ថ្ងៃ នៅជិតច្រកសមុទ្រយុទ្ធសាស្ត្រ Hormuz ហើយសមយុទ្ធនេះធ្វើឡើងនៅពេលភាពតានតឹងជាមួយសហរដ្ឋអាមេរិកកំពុងតែកើនឡើង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសមយុទ្ធប្រចាំរបស់អ៊ីរ៉ង់ ដែលបានចាប់ផ្តើមកាលពីថ្ងៃព្រហស្បតិ៍ម្សិលមិញនេះ គឺមានការចូលរួមពីកងទ័ពជើងទឹក ជើងគោក និងជើងអាកាស។ មិនតែប៉ុណ្ណោះ នាវាមុជទឹក រួមជាមួយយន្តហោះគ្មានមនុស្សបើករបស់អ៊ីរ៉ង ក៏ត្រូវបានដាក់ពង្រាយក្នុងសមយុទ្ធឈុតធំនេះដែរ។
លោក Habibollah Sayyari មេបញ្ជាការកងទ័ពជើងទឹកអ៊ីរ៉ង់និយាយថា សមយុទ្ធនេះត្រូវបានធ្វើឡើងក្នុងគោលបំណង បង្កើនការត្រៀមខ្លួនប្រឈមមុខនឹងការគំរាមកំហែងពីបរទេស ក៏ដូចជាការឈ្លានពានណាមួយដែលអាចកើតមានឡើង។ ស្របពេលជាមួយគ្នានេះ អ្នកនាំពាក្យសមយុទ្ធលោក Shahram Irani បានប្រាប់ប្រព័ន្ធផ្សព្វផ្សាយរដ្ឋអ៊ីរ៉ង់ថា សហរដ្ឋអាមេរិកបានដកយន្តហោះគ្មានមនុស្សបើករបស់ខ្លួន ចេញពីតំបន់ធ្វើសមយុទ្ធនេះ បន្ទាប់ពីមានការព្រមានពីអ៊ីរ៉ង់។
គួរជម្រាបដែរថា ទំនាក់ទំនងរវាងរដ្ឋធានីតេហេរ៉ង់និងវ៉ាស៊ីនតោន បានឈានដល់ដំណាក់កាលយាប់យ៉ឺន ចាប់តាំងពីឆ្នាំ ២០១៨ គឺនៅពេលដែលប្រធានាធិបតីអាមេរិក លោក ដូណាល់ ត្រាំបានដកអាមេរិកចេញពីកិច្ចព្រមព្រៀងនុយក្លេអ៊ែរ និងបន្ថែមការដាក់ទណ្ឌកម្មមកលើប្រទេសអ៊ីរ៉ង់ ដើម្បីឱ្យប្រទេសមួយនេះបញ្ឈប់កម្មវិធីនុយក្លេអ៊ែរ៕