តេហេរ៉ង់៖ ​ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា ប្រទេសអ៊ីរ៉ង់បានចាប់ផ្តើមធ្វើសមយុទ្ធយោធាប្រចាំរយៈពេល ៣ថ្ងៃ នៅជិតច្រកសមុទ្រយុទ្ធសាស្ត្រ Hormuz ហើយ​សមយុទ្ធនេះធ្វើឡើងនៅពេលភាពតានតឹងជាមួយសហរដ្ឋអាមេរិកកំពុងតែកើនឡើង។

សមយុទ្ធអ៊ីរ៉ង់នៅច្រកសមុទ្រយុទ្ធសាស្ត្រ Hormuz នៅថ្ងៃព្រហស្បតិ៍ទី ១០ ខែកញ្ញាឆ្នាំ ២០២០

សមយុទ្ធ​ប្រចាំរបស់អ៊ីរ៉ង់​ ដែលបានចាប់ផ្តើម​កាលពីថ្ងៃព្រហស្បតិ៍ម្សិលមិញនេះ គឺមានការចូលរួមពីកងទ័ពជើងទឹក ជើងគោក និងជើងអាកាស​។ មិនតែប៉ុណ្ណោះ នាវាមុជទឹក ​រួមជាមួយយន្តហោះគ្មានមនុស្សបើក​របស់អ៊ីរ៉ង ក៏ត្រូវបានដាក់ពង្រាយ​ក្នុងសមយុទ្ធ​ឈុតធំនេះដែរ។

សមយុទ្ធអ៊ីរ៉ង់នៅច្រកសមុទ្រយុទ្ធសាស្ត្រ Hormuz នៅថ្ងៃព្រហស្បតិ៍ទី ១០ ខែកញ្ញាឆ្នាំ ២០២០

លោក Habibollah Sayyari មេបញ្ជាការកងទ័ពជើងទឹកអ៊ីរ៉ង់​និយាយថា សមយុទ្ធនេះត្រូវបានធ្វើឡើងក្នុងគោលបំណង បង្កើនការត្រៀមខ្លួន​ប្រឈមមុខនឹងការគំរាមកំហែងពីបរទេស ក៏ដូចជាការឈ្លានពានណាមួយដែលអាចកើតមានឡើង។ ស្របពេលជាមួយគ្នានេះ អ្នកនាំពាក្យសមយុទ្ធលោក​ Shahram Irani បានប្រាប់ប្រព័ន្ធផ្សព្វផ្សាយរដ្ឋអ៊ីរ៉ង់ថា សហរដ្ឋអាមេរិកបានដកយន្តហោះគ្មានមនុស្សបើក​របស់ខ្លួន ចេញពីតំបន់ធ្វើសមយុទ្ធនេះ បន្ទាប់ពីមានការព្រមានពីអ៊ីរ៉ង់។

សមយុទ្ធអ៊ីរ៉ង់នៅច្រកសមុទ្រយុទ្ធសាស្ត្រ Hormuz នៅថ្ងៃព្រហស្បតិ៍ទី ១០ ខែកញ្ញាឆ្នាំ ២០២០

គួរជម្រាបដែរថា ទំនាក់ទំនងរវាង​រដ្ឋធានីតេហេរ៉ង់និងវ៉ាស៊ីនតោន បានឈានដល់ដំណាក់កាលយាប់យ៉ឺន​ ចាប់តាំងពីឆ្នាំ ២០១៨ គឺនៅពេលដែលប្រធានាធិបតីអាមេរិក លោក ដូណាល់ ត្រាំបានដកអាមេរិកចេញពីកិច្ចព្រមព្រៀងនុយក្លេអ៊ែរ និង​បន្ថែមការដាក់ទណ្ឌកម្ម​មកលើ​ប្រទេសអ៊ីរ៉ង់ ដើម្បីឱ្យប្រទេសមួយនេះបញ្ឈប់កម្មវិធីនុយក្លេអ៊ែរ៕

​យោធាអ៊ិរ៉ង

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]