ភ្នំពេញ៖ កម្ពុជាជាប្រទេសមួយ ដែលគោរពប្រតិបត្តិ ព្រះពុទ្ធសាសនា ជាសាសនាគោល ហេតុដូចនេះហើយ ទើបបានជាប្រជាពលរដ្ឋខ្មែរទូទៅ តែងតែប្រកាន់ខ្ជាប់ នៅទំនៀមទម្លាប់ទៅវត្តអារាម គោរពព្រះសង្ឈ ប្រគេនចង្ហាន់ នៅក្នុងថ្ងៃនៃពីធីបុណ្យជាតិធំៗ ដែលទាក់ទងនឹង ព្រះពុទ្ធសាសនា ជាដរាបមកទល់សព្វថ្ងៃនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាក់ស្តែង នៅក្នុងឱកាសនៃ ពិធីបុណ្យភ្ជុំបិណ្ឌនេះ ក៏មិនខុសគ្នា ពីឆ្នាំមុនៗដែរ។ ថ្វីត្បិត ក្នុងបរិបទនៃ ជំងឺកូវីត១៩ ធ្វើឲ្យចំនួននៃ ពុទ្ធបរិស័ទមានការថយចុះ មួយចំនួន ខុសពីឆ្នាំមុនៗក៏ដោយ តែគេក៏នៅតែ សង្កេតឃើញថា ក្នុងអំឡុងពេលនៃ ការកាន់បិណ្ឌទី១ដល់ទី៧នេះ មានប្រជាពលរដ្ឋខ្មែរ ស្រីប្រុសក្មេងចាស់ជាច្រើន បានពាក់ហូលផាមួង ក្នុងដៃកាន់ស្រាក់បាយម្ហូប ទានធូប ព្រមទាំងផ្កា ទៅប្រគេនដល់ព្រះសង្ឃ ដែលគង់នៅតាមទីវត្តអារាមនានា នៅទូទាំងប្រទេស ជាហូរហែដដែល។
ក៏ព្រោះតែ រហូតមកទល់ពេលនេះ ប្រជាពលរដ្ឋខ្មែរភាគច្រើន បានយល់ដឹងច្បាស់ អំពីវិធីសាស្ត្រ ការពារខ្លួនពី ការឆ្លងនៃ មេរោគកូវីដ១៩នេះ។ មិនតែប៉ុណ្ណោះ ក៏មានការអនុវត្ត ក៏ដូចជាវិធានការការពារខ្លួន ពីការឆ្លងនៃ មេរោគកូវីដ១៩នេះ យ៉ាងខ្ជាប់ខ្ជួនផងដែរ។
ក្នុងនោះដែរ បើតាមការលើកឡើង របស់យុវតីមួយរូបដែលមាន ឈ្មោះថា សុខ ផល្លា រតនៈ បានរៀបរាប់អំពី វិធីសាស្រ្តការពារខ្លួន ក្នុងពេលដែលមកកាន់បិណ្ឌ នៅវត្តក្នុងចំណោម មនុស្សជាច្រើននេះថា កញ្ញាបានពាក់ម៉ាស លាងដៃនិងទឹកអាកុលឬ ជែលជាប្រចាំ ដើម្បីបង្ការពីការរីករាលដាលបន្ថែម នៃមេរោគកូវីដ១៩នេះ។
មិនខុសគ្នាពី យុវតីខាងលើនេះទេ យុវតី យី កែវពិសី ក៏មានការការពារខ្លួន ដោយការពាក់ម៉ាស រួមទាំងលាងដៃ ដើម្បីបង្ការការឆ្លង នៃមេរោគនេះ ក្នុងអំឡុងមកវត្ត កាន់បិណ្ឌនេះដូចគ្នាដែរ។ ក្រៅពីនេះពិសី ក៏បានលើកឡើងបន្ថែម បែបនេះថា មិនថាតែពុទ្ធបរិស័ទ ចំណុះជើងវត្តជាច្រើន ដែលមកកាន់បិណ្ឌនេះ មានការការពារខ្លួនបាន យ៉ាងល្អនោះទេ តែសូម្បីតែព្រះសង្ឃ ក៏មានការការពារ ដោយការពាក់ម៉ាស និងបាញ់អាកុល ដូចគ្នាដែរ។
ហើយជាចុងក្រោយ យុវតីរូបនេះ ក៏សូមផ្តាំផ្ញើរប្រជាពលរដ្ឋខ្មែរ ទាំងអស់ត្រូវមាន ការការពារខ្លួន ពីជំងឺកូវីដ១៩ យើងត្រូវរួមគ្នាពាក់ម៉ាស លាងដៃជាមួយនឹងជែល ឬទឹកអាកុល។ ទោះបីជាមេរោគនេះ កាត់បន្ថយក្នុងប្រទេស ក៏ពិតមែន តែយើងក៏នៅតែ មិនទាន់ដឹងថា ពេលណាវានឹងបាត់ ទៅទាំងស្រុងដែរ។ ដូច្នេះយើងត្រូវរួមគ្នា ប្រឆាំងនឹងជម្ងឺកូវីដ១៩ ដើម្បីប្រទេសកម្ពុជា ទាំងអស់គ្នា៕
Bong I.T