Mason Greenwood និង Phil Foden ត្រូវបានដកចេញពីបញ្ជីជម្រើសជាតិ ដោយសារតែមូលហេតុនេះ

ខ្សែប្រយុទ្ធ Mason Greenwood និង ខ្សែបម្រើ Phil Foden ត្រូវបានដកចេញពីបញ្ជីជម្រើសជាតិអង់គ្លេសពីបទរំលោភគោលការណ៍ណែនាំសុវត្ថិភាពដើម្បីប្រយុទ្ធប្រឆាំងនឹងជំងឺ Covid-19 ។ ដោយសារកីឡាករវ័យក្មេងទាំង២រូបនេះបាននាំមនុស្សស្រីវ័យក្មេងចូលទៅសណ្ឋាគាររបស់ក្រុមជម្រើសជាតិខ្លួននៅប្រទេសអុីស្លង់ បន្ទាប់ពីបានបង្ហាញខ្លួនជាលើកដំបូងនៅក្នុងព្រឹត្តិការណ៍ UEFA Nations League ។

ជាការកត់សម្គាល់ មនុស្សស្រីម្នាក់ក្នុងចំណោមពួកគេបានបង្ហោះវីដេអូនៅលើ Snapchat ហើយនៅក្នុងខ្សែវីដេអូនោះ គេសង្កេតឃើញមានកីឡាកររបស់ Man City និង Man United អង្គុយនៅបន្ទប់សណ្ឋាគារតែមួយ។

គួរបញ្ជាក់ផងដែរថា គោលការណ៍ណែនាំសុវត្ថិភាពក្នុងការប្រយុទ្ធប្រឆាំងនឹង Covid-19 គឺមិនតម្រូវឱ្យកីឡាករនាំភ្ញៀវមកជាមួយក្នុងអំឡុងពេលធ្វើដំណើរជាមួយក្រុមនោះទេ។ ដូច្នេះ ដោយការល្មើសបែបនេះ Greenwood និង Foden នឹងមិនអនុញ្ញាតិឱ្យធ្វើដំណើរពី Reykjavik ទៅ Copenhagen ជាមួយក្រុមដើម្បីប្រកួតទល់នឹងដាណឺម៉ាកនោះទេ៕

ប្រភព៖ Tribuna