កាប៊ុល៖ ក្រុមអាជ្ញាធរអាហ្វកានីស្ថានបានរាយការណ៍ថា គ្រោះទឹកជំនន់ដែលបណ្តាលមកពីភ្លៀងធ្លាក់ខ្លាំង នៅទីក្រុង Charikar ខេត្ត Parwan ភាគខាងជើងប្រទេសអាហ្វកានីស្ថានកាលពីព្រឹកព្រលឹមថ្ងៃពុធ បានបណ្តាលឱ្យមនុស្សយ៉ាងហោចណាស់ ១០០នាក់ ត្រូវស្លាប់បាត់បង់ជីវិត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអាជ្ញាធរក្នុងតំបន់បានឱ្យដឹងទៀតថា ក្រៅពីចំនួនអ្នកស្លាប់ ក៏មនុស្សជាច្រើនទៀតបានរងរបួស ហើយផ្ទះសម្បែងប្រមាណ ៥០០ខ្នង ត្រូវរងការបំផ្លិចបំផ្លាញ។ ចំនួនអ្នកស្លាប់ ត្រូវបានគេរាយការណ៍ជាបន្តបន្ទាប់ ខណៈក្រុមអ្នកជួយសង្គ្រោះ នៅតែបន្តស្វែងរកអ្នកនៅរស់រានមានជីវិត ដែលកប់ជាប់ក្រោមគំនរបាក់បែកនៃអគារ ឬផ្ទះសម្បែង។
គួរឱ្យដឹងដែរថា តំបន់ភាគខាងជើងនិងខាងកើតប្រទេសអាហ្វកានីស្ថាន តែងកើតមានគ្រោះទឹកជំនន់ជាញឹកញាប់ ដោយសារតែភ្លៀងធ្លាក់ខ្លាំង។ ហើយកាលពីដើមខែនេះ មានមនុស្សយ៉ាងតិច ១៦នាក់ ដែលភាគច្រើនជាកុមារ បានស្លាប់ដោយសារជំនន់ទឹកភ្លៀង នៅភូមិក្នុងមួយសិ្ថតនៅភាគខាងកើតខេត្ត Nangarhar របស់ប្រទេសមួយនេះ៕