ឥណ្ឌាគ្រោងដាក់ដំណើរការ នាវាមុជទឹកដ៏​មានអានុភាពថ្មី

ញូដេលី៖ INS Karanj ដែលជានាវាមុជទឹកទី៣ នៃ​សែស្រឡាយនាវាមុជទឹក Kalvari កំពុងត្រូវបានរៀបចំ​ដាក់ឱ្យចូលបម្រើការក្នុងជួរកងទ័ពជើងទឹកឥណ្ឌា​រយៈពេល ៤ទៅ៥ ខែខាងមុខទៀតនេះ។ នាវាមុជទឹក INS Karanj ត្រូវបានបញ្ជូនទៅធ្វើតេស្តក្នុងសមុទ្រដំបូងកាលពីឆ្នាំ ២០១៨ ដោយបានទទួលបានលទ្ធផលយ៉ាងជោគជ័យបំផុត ហើយចំណែកនាវាមុជទឹកទី៤ INS Vela នៃ​សែស្រឡាយតែមួយនេះ ក៏នឹងត្រូវ​ដាក់បម្រើការក្នុងជួរកងទ័ពជើងទឹកឥណ្ឌាផងដែរ នៅដំណាច់ឆ្នាំក្រោយ។

នាវាមុជទឹក​ថ្មីរបស់ឥណ្ឌានេះ មានសមត្ថភាពអាច​មុជទឹកក្នុងសមុទ្របានរយៈពេល ៥០ថ្ងៃ និងអាចធ្វើដំណើរម្តងបានរយៈចម្ងាយ ១២,០០០គីឡូម៉ែត្រ​។ ​មិនតែប៉ុណ្ណោះ វាក៏អាចធ្វើដំណើរក្នុងសមុទ្រជាមួយនឹងល្បឿន ៣៧គីឡូម៉ែត្រក្នុងមួយម៉ោង និង​អាចមុជចុះទៅក្រោមបានជម្រៅរហូតដល់ ៣៥០ម៉ែត្រ​។

គួរឱ្យដឹងដែរថា កាលពីឆ្នាំ១៩៩៧ ​កងទ័ពជើងទឹកឥណ្ឌាបានរៀបចំផែនការដ៏ធំមួយ ដើម្បី​បង្កើតកងនាវាមុជទឹកដែលមានឥទ្ធិពលបំផុត តាមរយៈផែនការសាងសង់នាវាមុជទឹកថ្មីឱ្យបានចំនួន ២៤គ្រឿងនៅត្រឹមឆ្នាំ ២០២៤ ប៉ុន្តែផែនការមួយនេះ នៅតែដំណើរការយឺតជាងកាលបរិច្ឆេទ ដោយសារតែបញ្ហាមួយចំនួន រួមបញ្ចូលទាំងការឆ្លងរាលដាលនៃជំងឺកូវីដ១៩៕