ផ្លូវការ!! Arsenal ចុះកិច្ចសន្យាយក Willian ពី Chelsea ដោយគ្មានតម្លៃខ្លួន

អង់គ្លេស៖ ក្លិបកាំភ្លើងធំ Arsenal បានចុះកិច្ចសន្យាផ្ទេរយកខ្សែប្រយុទ្ធស្លាប Willian ពីក្លិបតោខៀវ Chelsea ។ ជាមួយគ្នានេះ បើយោងតាមរបាយការណ៍របស់កាសែត The Mirror ជម្រើសជាតិប្រេស៊ីល បានចុះកុងត្រារយៈពេល៣ឆ្នាំ ជាមួយក្រុមលោក Mikel Arteta ដោយទទួលបានប្រាក់ពលកម្ម១៥ម៉ឺនផោន (ឬប្រមាណ១៩ម៉ឺនដុល្លារ) ក្នុង១សប្ដាហ៍។

គួររម្លឹកដែរថា Willian បានផុតកុងត្រាជាមួយ Chelsea កាលពីដំណាច់ខែកក្កដា កន្លងទៅ ដូច្នេះមានន័យថា រូបគេបានផ្លាស់មកកាន់ Arsenal ដោយគ្មានតម្លៃខ្លួននោះទេ ក្រោយចំណាយពេល៧ឆ្នាំ​ នៅកីឡដ្ឋាន Stamford Bridge ជួយក្រុមតោខៀវ លើកពាន Premier League បាន២ដង ពាន FA Cup ១ដង និង ពាន League Cup ១ដង។

ដោយឡែកក្នុងរដូវកាលនេះ មុនពេលផ្ទេរមកទឹកដី Emirates ខ្សែប្រយុទ្ធវ័យ៣២ឆ្នាំ បង្ហាញខ្លួនក្នុងក្រុមលោក​ Frank Lampard បាន ៤៧ប្រកួត ក្នុងនោះគេស៊ុតបញ្ចូលទីបាន១១គ្រាប់ និងបោះបាល់ឲ្យមិត្តរួមក្រុមបញ្ចប់ទីបាន៧ដង៕

ប្រភព៖ mirror