Zidane ព្រមលក់ទេ?​ ​Man Utd កំពុងតែចាប់អារម្មណ៍ចង់បានតារាវ័យក្មេងរបស់ R.Madrid ម្នាក់នេះ

បរទេស៖ ក្លិបបិសាចក្រហម Manchester United ត្រូវបានគេរាយការណ៍មកថាកំពុងតែធ្វើការស៊ើបសួរភ្នាក់ងាររបស់ក្លិប Real Madrid ដើម្បីដាក់សំណើទិញយកកីឡាករវ័យ២០ឆ្នាំ Vinicius Junior មកកាន់ទឹកដី Old Trafford នៅរដូវក្ដៅនេះ។

ខណៈដែលការចរចាតម្លៃខ្លួនកីឡាករ Jadon Sancho ជាមួយក្លិប Borussia Dortmund មានការជាប់គាំង Man Utd កំពុងតែបង្វែរគោលដៅទៅរកកីឡាករផ្សេងទៀតបណ្តើៗហើយ។ ក្នុងនោះក្លិបលោក Ole Gunnar Solskjær មួយនេះកំពុងតែចាប់អារម្មណ៍ចង់បាន Vinicius Junior មកជួយក្រុមនៅតំបន់ប្រយុទ្ធស្លាបរដូវកាលក្រោយ។ 

គួរឲ្យដឹងដែរថាជម្រើសជាតិប្រេសុីលរូបនេះមិនសូវជាសប្បាយចិត្តជាមួយលោក Zinedine Zidane ប៉ុន្មានទេ ដោយសារតែមិនបានចូលលេងកាលប៉ះជាមួយក្លិប Manchester City សប្តាហ៍មុននោះ។  យ៉ាងណាមិញ Zidane ហាក់ដូចជាគ្មានគម្រោងលក់កីឡាកររូបនេះចេញនោះទេ ដោយទើបតែទិញរូបគេមករួមក្រុមបាន២រដូវកាលនោះ។ 

ស្របពេលជាមួយគ្នានេះដែរកីឡាករ Vinicius Junior នៅសល់កុងត្រាជាមួយ Real Madrid រហូតដល់ឆ្នាំ២០២៥ ឯណោះហើយក្រៅពីក្លិប Man Utd ក៏កំពុងនៅមានក្លិបធំៗជាច្រើនទៀតចង់បានរូបគេទៅរួមក្រុមមានដូចជាក្លិប Chelsea, Arsenal និង Paris Saint-Germain ជាដើម៕ 

ប្រភព៖ sportsmole