ម៉ូស្គូ៖ មន្រ្តីជាន់ខ្ពស់រុស្ស៊ីបាននិយាយកាលពីថ្ងៃអង្គារថា ប្រទេសរុស្ស៊ីបានដាក់ឈ្មោះវ៉ាក់សាំងកូវីដ១៩ ដែលទើបត្រូវបានអនុម័តជាលើកដំបូងថា Sputnik V ដោយយកតាមឈ្មោះផ្កាយរណបដំបូងបង្អស់របស់អតីតសហភាពសូវៀត ត្រូវបានដាក់ឱ្យដំណើរការកាលពីឆ្នាំ១៩៥៧ ក៏ដូចជាអ្វីដែលរដ្ឋធានីម៉ូស្គូមើលឃើញថា រុស្ស៊ីគឺជាប្រទេសដំបូងគេលើលោក ដែលបានធ្វើការអនុម័តជាផ្លូវការនូវវ៉ាក់សាំងកូវីដ១៩។ នេះបើតាមការផ្សាយរបស់ទីភ្នាក់ងារសារព័ត៌មានរ៉យទ័រ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Kirill Dmitriev នាយកប្រតិបត្តិមូលនិធិ Russian Direct Investment Fund (RDIF) គាំទ្រដោយរដ្ឋាភិបាលរុស្ស៊ីបានឱ្យដឹងថា ប្រទេសរុស្ស៊ីទទួលបានការបញ្ជាទិញវ៉ាក់សាំងកូវីដ១៩ពីប្រទេសជាង២០នៅទូទាំងពិភពលោក ដែលមានចំនួនរហូតដល់ទៅ ១ពាន់លានដូស។
គួរឱ្យដឹងដែរថា កាលពីថ្ងៃអង្គារម្សិលមិញនេះ ប្រធានាធិបតីរុស្ស៊ី លោក វ៉្លាឌីមៀ ពូទីន បានប្រកាសថា ក្រសួងសុខាភិបាលរុស្ស៊ីបានធ្វើការអនុម័តជាផ្លូវការនូវវ៉ាក់សាំងកូវីដ១៩ជាលើកដំបូង ហើយព្រមទាំងបានអះអាងថា កូនស្រីរបស់លោកបានចាក់វ៉ាក់សាំងនេះរួចហើយ។ ប៉ុន្តែបើទោះបីជាយ៉ាងណាក្តី អ្នកវិទ្យាសាស្ត្រជាច្រើននៅទូទាំងពិភពលោក មិនទាន់អាចផ្តល់ការទុកចិត្តទាំងស្រុង ទៅលើវ៉ាក់សាំងរបស់ប្រទេសរុស្ស៊ីនេះនៅឡើយទេ៕