ផ្លូវការ!! ខ្សែបម្រើវ័យក្មេងរូបនេះ បានចាកចេញពី Man UTD ចុះកុងត្រា៥ឆ្នាំលេងឲ្យក្លិប Lille នៅលីគកំពូលបារាំង

អង់គ្លេស៖ ខ្សែបម្រើវ័យក្មេង Angel Gomes បានចុះកុងត្រា៥ឆ្នាំ លេងឲ្យក្លិប Lille បន្ទាប់ពីចែកផ្លូវគ្នាជាមួយក្រុមបិសាចក្រហម Manchester United កាលពីខែមុន។

យ៉ាងណាមិញ កីឡាករវ័យ១៩ឆ្នាំ នៅមិនទាន់អាចចូលលេងឲ្យក្លិប Lille នៅឡើយទេ ដោយត្រូវបានក្លិបនៅ Ligue1 មួយនេះ បញ្ជូនទៅឲ្យក្រុម Boavista ខ្ចីជើងបន្ត។

​Gomes បានចាកចេញពី Man UTD កាលពីថ្ងៃទី១ ខែកក្កដា កន្លងទៅ បន្ទាប់រូបគេសម្រេចចិត្តបដិសេធមិនបន្តកុងត្រាថ្មីជាមួយក្លិបជើងឯក Premier League ១៣សម័យ។

គួររម្លឹកផងដែរថា Gomes បានរួមរស់នៅទឹកដី​ Old Trafford តាំងពីគេមានអាយុ៥ឆ្នាំ មកម្ល៉េះ ខណៈរូបគេបានចូលលេងក្នុងក្រុមឈុតធំជាលើកដំបូងក្នុងឆ្នាំ២០១៧ ក្នុងនាមកីឡាករដែលមានវ័យក្មេងជាងគេ បង្ហាញខ្លួនក្នុងក្រុមឈុតធំរបស់ Man UTD ពោលគឺស្ថិតក្នុងវ័យ ១៦ឆ្នាំ​ និង២៦៣ថ្ងៃ។

ដោយឡែកចាប់តាំងពីលោក Ole Gunnar Solskjaer មកកាន់តំណែងជាអ្នកចាត់ការទូទៅ ជំនួសលោក Jose Mourinho ក្នុងឆ្នាំ២០១៨មក ខ្សែបម្រើសញ្ជាតិអង់គ្លេស Gomes បង្ហាញខ្លួនបាន៨ប្រកួតប៉ុណ្ណោះ សម្រាប់ក្រុមបិសាចក្រហម ៕

ប្រភព៖ skysports