ចប់អស់ហើយ! តោះមកមើលថាតើលីគមួយណាស្វិតស្វាញជាងគេក្នុងចំណោមលីគកំពូលធំៗទាំង៥នៅអឺរ៉ុបរដូវកាលនេះ

អឺរ៉ុប៖  ប្រិយមិត្តភាគច្រើនសុទ្ធតែដឹងហើយថា ឆ្នាំនេះជារដូវកាលដ៏ចម្លែកបំផុតមិនធ្លាប់មាននៅក្នុងវិស័យបាល់ទាត់កន្លងមក ដោយក្លិបធំៗនៅអឺរ៉ុបត្រូវផ្អាកការប្រកួតមួយរយៈធំ ក៏ដូចជាធ្វើការប្រកួតដោយគ្មានអ្នកគាំទ្រនៅពេលដែលបើកឡើងវិញនោះ។ យ៉ាងណាមិញលីគកំពូលធំៗទាំងប្រាំនៅទ្វីបអឺរ៉ុបក៏បានរកឃើញជើងឯករដូវកាល២០១៩-២០២០រៀងៗខ្លួនរួចហើយដែរ។ ហើយខាងក្រោមនេះជាស្ថិតិដែលបង្ហាញថានៅក្នុងចំណោមលីគកំពូលទាំង៥នោះ តើលីគមួយណាមានការប្រកួតប្រជែងស្វិតស្វាញជាងគេ៖

• Premier League 

ម្ចាស់ជើងឯកហង្សក្រហម Liverpool រកបាន៩៩ពិន្ទុ លើសក្រុមលេខ២ Manchester City រហូតដល់ទៅ១៨ពិន្ទុ និងលើសក្រុមលេខ៣ Manchester United ចំនួន៣៣ពិន្ទុឯណោះ។ ប៉ុន្តែបែរជាមានការប្រជែងដ៏ស្វិតស្វាញក្នុងការដណ្តើមយកកៅអីទៅលេង Champions League រដូវកាលក្រោយទៅវិញ​ ពោលគឺរវាងក្លិប Manchester United, Chelsea, Leicester និង Wolves ។

• La Liga

ដើម្បីអាចរកឃើញម្ចាស់ជើងឯក លីគកំពូល La Liga ត្រូវចាំដល់សប្តាហ៍ទី៣៧ឯណោះ ពោលគឺក្លិប Real Madrid ជាម្ចាស់ពានមួយនេះ ដែលឈរពីលើ Barcelona ចំនួន៥ពិន្ទុ។ ចំណែកឯក្រុមលេខ៣ Atletico Madrid និងក្រុមលេខ៤ Sevilla នៅក្រោយ Real Madrid ចំនួន១៧ពិន្ទុ។

• Serie A

វាដូចជាចម្លែកណាស់ដែលថា Serie A ជាលីគកំពូលដែលមានការប្រកួតប្រជែងខ្ពស់នោះ ដោយសារតែ Juventus គ្រោងជើងឯកមួយនេះ ៩រដូវកាលជាប់ៗគ្នាទៅហើយ។ ប៉ុន្តែនៅក្នុងរដូវកាលនេះ Juventus ឈរនៅពីលើក្រុមលេខ២ Inter Milan តែមួយពិន្ទុប៉ុណ្ណោះ និងឈរពីលើក្រុមលេខ៣ Atalanta និងក្រុមលេខ៤ Lazio ចំនួន៥ពិន្ទុ។

• Bundesliga

ក្លិប Bayern Munich ក្លាយជាម្ចាស់ពានរង្វាន់មួយនេះ៨រដូវកាលជាប់ៗគ្នា ដោយនៅក្នុងរដូវកាលនេះបានវ៉ាដាច់ក្រុមលេខ២ Borussia Dortmund ចំនួន១៣ពិន្ទុ និងនៅពីលើក្លិបលេខ៣ RB Leipzig ចំនួន១៦ពិន្ទុ។

• Ligue 1

លីគកំពូលមួយនេះត្រូវបង្ខំចិត្តបញ្ចប់រដូវកាលរបស់ខ្លួន បើទោះជានៅសល់១០ប្រកួតទៀតទើបគ្រប់ក៏ដោយ។ ហើយម្ចាស់ជើងឯកនោះគឺក្លិបអ្នកមាន Paris Saint-Germain ដែលមាន១២ពិន្ទុលើសក្រុមលេខ២ Olympique Marseille ៕

ប្រភព៖ givemesport