គ្នាយើងខ្លះអាចនឹងមានការរវល់ខ្លាំង ជាហេតុនាំឲ្យអាចរំលងអាហារពេលព្រឹក។ ការរំលងអាហារពេលព្រឹក គឺប្រៀបដូចជាយើងរំលងអត្ថប្រយោជន៍ចំពោះសុខភាពដែលបានមកពីអាហារពេលព្រឹកអ៊ីចឹងដែរ។ អត្ថបទនេះនឹងលើកឡើងពីអត្ថប្រយោជន៍ចំពោះសុខភាពសម្រាប់គ្នាយើងដែលញ៉ាំអាហារពេលព្រឹករាល់ថ្ងៃ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. បង្ការការឡើងទម្ងន់
ការសិក្សាជាច្រើនបានអះអាងថាអ្នកញ៉ាំអាហារព្រឹកមានភាពងាយស្រួលក្នុងរក្សាទម្ងន់។ ការសិក្សាមួយធ្វើឡើងដោយសាកលវិទ្យាល័យ Tel Aviv បង្ហាញថាការញ៉ាំរបបអាហារដែលមានកាបូអ៊ីដ្រាតល្អ (បន្លែ ផ្លែឈើ គ្រាប់ធញ្ញជាតិ) ប្រូតេអ៊ីន និងបង្អែមបន្តិចបន្តួចអាចជួយដល់ជម្រើសអាហារដ៏ល្អពេញមួយថ្ងៃ។ អាហារពេលព្រឹកបែបនេះអាចជួយឲ្យរាងកាយឆ្អែតបានយូរ មិនញ៉ាំហួសកំណត់ ឬឃ្លានផ្ដេសផ្ដាស ហើយនេះក៏ជួយដល់ការរក្សាទម្ងន់ដែរ។
២. បង្កើនការផ្ចង់អារម្មណ៍
នៅពេលយើងគេង រាងកាយយើងក៏សម្រាកដែរ ហើយការរំលងអាហារពេលព្រឹកធ្វើឲ្យរាងកាយព្យាយាមបង្កើតថាមពលបន្ថែមដែលបង្កឲ្យខួរក្បាល និងរាងកាយធ្វើការកាន់តែខ្លាំងរួមទាំងផលិតអ័រម៉ូនស្ត្រេស។ នេះធ្វើឲ្យយើងមានអារម្មណ៍ថាហត់។ ការញ៉ាំអាហារពេលព្រឹកគឺផ្តល់ថាមពលដល់ខួរក្បាល និងរាងកាយដើម្បីបង្កើនការផ្ចង់អារម្មណ៍ និងដាស់ស្មារតីពេញមួយថ្ងៃ។
៣. កាត់បន្ថយហានិភ័យបញ្ហាបេះដូង
ការសិក្សាមួយបានឲ្យដឹងថាអត្រាជំងឺធាត់មានការថយចុះពី៣៥ទៅ៥០%សម្រាប់អ្នកញ៉ាំអាហារពេលព្រឹករាល់ថ្ងៃបើធៀបទៅនឹងអ្នកអត់ញ៉ាំអាហារពេលព្រឹក។ ការសិក្សានេះអះអាងថាការញ៉ាំអាហារពេលព្រឹកដែលមានរបបអាហារល្អសម្រាប់សុខភាពជួយបង្ការជំងឺធាត់ ជំងឺទឹកនោមផ្អែម និងជំងឺបេះដូង។
៤. បង្ការការញ៉ាំលើសកំណត់
៥០% នៃអ្នករំលងអាហារពេលព្រឹកមានបញ្ហាលើសទម្ងន់។ ការរំលងអាហារពេលព្រឹកបណ្ដាលឲ្យរាងកាយឃ្លានខ្លាំង។ នៅពេលឃ្លានខ្លាំង យើងតែងញ៉ាំអ្វីៗគ្រប់យ៉ាង និងក្នុងកម្រិតច្រើន។ យ៉ាងណាមិញ យើងអាចបង្ការការញ៉ាំហួសកំណត់បានដោយការញ៉ាំអាហារពេលព្រឹកព្រោះអាហារពេលព្រឹកជួយយើងឆ្អែតបានយូរ និងមិនសូវឃ្លាន។
៥. ជួយបង្កើតជម្រើសអាហារល្អៗ
អ្នកដែលញ៉ាំអាហារពេលព្រឹកជាទូទៅមានទម្លាប់ញ៉ាំរបបអាហារល្អសម្រាប់សុខភាព និងមិនសូវឃ្លានអាហារសម្រន់អំឡុងពេលថ្ងៃដូចអ្នករំលងអាហារពេលព្រឹកទេ។ គ្នាយើងដែលរំលងអាហារពេលព្រឹកតែងញ៉ាំអាហារសម្រន់នៅពេលព្រឹក ឬពេលរសៀល។ បញ្ហាគឺថាអាហារសម្រន់ទាំងនោះមានជាតិសរសៃ វីតាមីន និងជាតិរ៉ែទាប ប៉ុន្តែមានជាតិខ្លាញ់ និងអំបិលច្រើន។ ក្រៅពីនេះ គ្នាយើងមួយចំនួនអាចនឹងមានអារម្មណ៍ហត់ និងជ្រើសរើសផឹកភេសជ្ជៈប៉ូវកម្លាំង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet