រូបភាពមួយសន្លឹកដ៏មានន័យ នៃបុរសបោសសម្អាតចិញ្ចើមផ្លូវ នឹកប្រពន្ធខ្លាំងពេក កាយស្លឹកឈើចេញជារូបបេះដូង កំពុងឆាបយកបេះដូងមហាជនជាច្រើន…

ឌូបៃ៖ កាលពីថ្មីៗនេះ រូបភាពមួយសន្លឹកបាននឹងកំពុងតែឆាបយកបេះដូងមហាជនជាច្រើននៅលើបណ្ដាញសង្គមឲ្យរំជួលចិត្ត ជុំវិញនឹងសកម្មភាពរបស់បុរសម្នាក់ ដែលត្រូវបានគេប្រមាញ់បានតាមមាត់បង្អួច ក្នុងទីក្រុងឌូបៃ ប្រទេសអេមីរ៉ាតអារ៉ាប់រួម។

ផ្អែកតាមរយៈរូបភាព បានបង្ហាញឲ្យឃើញថា បុរសនោះ បានបោសសម្អាតចិញ្ចើមផ្លូវ ដោយប្រមូលម្ដុំស្លឹកឈើដែលជ្រុះ ហើយកាយចេញជារូបបេះដូងយ៉ាងស្រស់ស្អាត។

ក្រោយពីរូបភាពល្បីល្បាញរួចមក អត្តសញ្ញាណរបស់បុរសនោះ ក៏ត្រូវបានបង្ហាញ ដែលលោកមានឈ្មោះថា Ramesh Gangarajam Gandi អាយុ៣០ឆ្នាំ និងជាបុគ្គលិកផ្នែកបោសជូតសម្អាត នៅក្នុងក្រុមហ៊ុនមួយ។

ទន្ទឹមនឹងនេះដែរ លោក Ramesh បានប្រាប់ប្រភពសារព័ត៌មានថា រូបលោកផ្ទាល់បានរៀបការជាមួយនឹងភរិយាកាលពីខែសីហា ឆ្នាំ២០១៩កន្លងទៅ។ ហើយលុះដល់ខែកញ្ញា ឆ្នាំ២០១៩ដដែល លោកក៏ត្រូវប្ដូរមករស់នៅក្នុងទីក្រុងឌូបៃដើម្បីធ្វើការ។ សព្វថ្ងៃនេះ ភរិយារបស់លោកកំពុងរស់នៅជាមួយក្រុមគ្រួសារក្នុងប្រទេសឥណ្ឌា និងមិនមានពេលវេលារួមរស់ជាមួយលោកឡើយ។ ហើយលោកពិតជានឹកភរិយា និងព្រួយបារម្ភពីឪពុកដែលកំពុងមានបញ្ហាសុខភាព បូករួមទាំងវ័យចាស់ជរាផងដែរ។

លោក Ramesh បន្ដទៀតថា នៅថ្ងៃដែលលោកកាយស្លឹកឈើចេញជារូបបេះដូង លោកមិនបានដឹងឡើយថាមានមនុស្សសង្កេតឃើញពីសកម្មភាពរបស់លោក។ ហើយលោកមានការភ្ញាក់ផ្អើលជាខ្លាំង នៅពេលដែលរូបភាពល្បីល្បាញពាសពេញបណ្ដាញសង្គម។

យ៉ាងណាមិញ ខាងក្រសួងអភិវឌ្ឍន៍សហគមន៍ប្រចាំប្រទេស បានផ្ដល់ជូននូវកញ្ចប់អំណោយទៅដល់លោក Ramesh ដើម្បីបង្ហាញពីការគាំទ្រ និងការស្រលាញ់។ ហើយលោក Ramesh ក៏គ្រោងនឹងធ្វើដំណើរទៅជួបក្រុមគ្រួសារវិញ ក្នុងពេលឆាប់ៗខាងមុខនេះផងដែរ៕

សូមទស្សនារូបភាពខាងក្រោម៖