នាយករដ្ឋមន្រ្តី អនុញ្ញាត​ឱ្យមាន​សកម្មភាព​ហាត់​ប្រាណ និងលេង​កីឡា​​តាម​ទីធ្លាសាធារណៈ តែហាម​ហាត់​តាម​ក្លឹប​ដែល​​ប្រើ​​សម្ភារៈ​​រួម​គ្នា​

សម្តេចតេជោ ហ៊ុន សែន នាយករដ្ឋមន្រ្តី បានអនុញ្ញាតឱ្យបើកដំណើរការឡើងវិញនូវសកម្មភាពហាត់ប្រាណ លេង​កីឡា​តាមទីធ្លាសាធារណៈ និងបរិវេណស្តាតអូឡាំពិក ដើម្បីអាចឲ្យប្រជាពលរដ្ឋហាត់ប្រាណដើម្បីសុខភាព តែមិន​អនុញ្ញាតឲ្យមានសកម្មភាពហាត់ប្រាណតាមក្លឹបកីឡា ដែលប្រើប្រាស់សម្ភារៈរួមគ្នាទេ។ នេះបើតាមលិខិតផ្លូវការ​របស់ក្រសួងអប់រំ យុវជន និងកីឡា។

ក្នុងលិខិតដដែលបញ្ជាក់ថា៖ «ដោយបច្ចុប្បន្ននេះ​ ការទប់ស្កាត់ការរាលដាលកូវីដ១៩ នៅកម្ពុជាមានសភាពល្អប្រសើរ និងអាចគ្រប់គ្រងបាន និងដើម្បីលើកកម្ពស់ការថែទាំសុខភាពផ្លូវកាយ និងផ្លូវចិត្តរបស់ពលរដ្ឋ តាមរយៈការហាត់​ប្រាណ​ និងលេងកីឡា ក្រសួងបានទទួលការអនុញ្ញាតពីសម្តេចនាយករដ្ឋមន្ត្រី ដើម្បីដំណើរការឡើងវិញនូវសកម្មភាព​ហាត់ប្រាណ លេងកីឡាតាមទីធ្លាសាធារណៈ និងបរិវេណស្តាតអូឡាំពិក លើកលែងតែសកម្មភាពហាត់​ប្រាណតាម​ក្លឹបកីឡា ដែលប្រើប្រាស់សម្ភារៈរួមគ្នា។

គួររំឭកថា កាលពីថ្ងៃ ០២ មេសាកន្លងទៅ រដ្ឋាភិបាលកម្ពុជាបានបញ្ជាឱ្យបិទកន្លែងហាត់ប្រាណ និងក្លិបហាត់ប្រាណ​នៅទូទាំងប្រទេស ដើម្បី​ទប់ស្កាត់ការរីករាលដាលនៃជំងឺ COVID-19 ។

សូមអានព័ត៌មានលម្អិតតាមរយៈសេចក្តីជូនដំណឹងខាងក្រោម៖