បច្ចុប្បន្ននេះ នៅតាមផ្ទះភាគច្រើន ប្រើចង្រ្គានហ្គាស ជំនួសចង្រ្គានធ្យូងដើម្បីចម្អិនម្ហូបអាហារ និងកាត់បន្ថយ​ពេល​វេលា។ ទោះជាយ៉ាងណា ការប្រើប្រាស់ហ្គាស ក៏មានគុណវិបត្តិដែរ ដូចជាពាក្យចាស់ៗធ្លាប់និយាយ ស៊ូលិចទូក​កណ្តាលទន្លេ ប្រសើរជាងមានគ្រោះអគ្គិភ័យ។ ជាពិសេស ករណីផ្ទុះហ្គាសនេះតែម្តង មិនត្រឹមតែបាត់បង់ទ្រព្យ​សម្បត្តិ​ទេ គឺអាចឆក់យកជីវិតមនុស្សត្រឹមតែមួយពព្រិចភ្នែក។ ដូចនេះវិធី ៧យ៉ាងខាងក្រោមជាមេរៀនសម្រាប់ការទប់ស្កាត់ ដើម្បីជៀសវាងពីការផ្ទុះហ្គាស ៖

១. ត្រូវមានធុងពន្លត់អគ្គិភ័យនៅក្នុងផ្ទះ

គ្រោះអគ្គិមើលមិនឃើញឡើយ ហើយដើម្បីការពារ គឺត្រូវមានបំពង់ពន្លត់អគ្គិភ័យយ៉ាងតិច ២បំពង់នៅក្នុងផ្ទះ ជាពិសេសត្រូវដាក់នៅក្បែរផ្ទះបាយ ឬកន្លែងចម្អិនម្ហូម។

២. មិនត្រូវប្រើធុងហ្គាសចាស់ៗ ឬឆ្នាំផលិតយូរៗ

ការជ្រើសរើសធុងហ្គាស ឬកំប៉ុងហ្គាស ពិតជាសំខាន់ណាស់ ព្រោះកាលណាធុងចាស់ ឬផលិតយូរឆ្នាំ អាចធ្វើឲ្យលិចហ្គាសចេញ និងបង្កឲ្យផ្ទុះបានយ៉ាងងាយ។

៣. ប្រើក្បាលអូតូ ដើម្បីការពារសុវត្ថិភាព

ការប្រើក្បាលអូតូហ្គាសសុវត្ថិភាព គឺអាចការពារហ្គាសចេញក្រៅតាមទិយ៉ូ បន្ទាប់ពីបិទធុងហ្គាស និងអស់ក្តីបារម្ភ​ហ្គាសចេញតាមមាត់ធុងជាដើម។

៤. មិនត្រូវដាក់កំប៉ុងថ្នាំបាញ់មូសនៅក្បែរចង្គ្រាន

នៅក្នុងថ្នាំបាញ់មូសគ្រប់ប្រភេទ សុទ្ធតែមានផ្ទុកសារធាតុម្យ៉ាង ដែលអាចបង្កឲ្យមានការឆាបឆេះបានយ៉ាងងាយ។ មួយវិញទៀត ដាច់ខាតមិនត្រូវប្រើដែកកេស និងជក់បារីនៅក្បែរធុងហ្គាសឡើយ។

៥. ត្រូវដាក់ធុងហ្គាសឆ្ងាយពីចង្រ្គាន

ហ្គាស និងភ្លើង គឺមិនអាចដាក់នៅក្បែរគ្នាបានជាដាច់ខាត ព្រោះខ្លាចមានហ្គាសលិចធ្លាយចេញ ដោយមិនដឹងខ្លួន និងបណ្តាលឲ្យឆាបឆេះ។

៦. ​កុំយកទឹកមកពន្លត់ពេលមានហ្គាសឆាបឆេះ ឬឆេះចង្ក្រាន

នៅពេលដែលប្រើទឹកមកពន្លត់​ ខណៈពេលដែលកំពុងឆាបឆេះ គឺកាន់តែឆាបឆេះខ្លាំង ឬអាចនឹងផ្ទុះ។

៧. ទាក់ទងហាងលក់ហ្គាស ឬជាងហ្គាសពេលធុំក្លិនហ្គាស

ត្រូវទាក់ទងហៅហាងលក់ហ្គាស ឬជាងជួសជុលហ្គាសឲ្យបានប្រញាប់នៅពេលមានក្លិនហ្គាស ដើម្បីបិទធុងហ្គាស ឬពិនិត្យក្រែងមានលិច ឬធ្លាយហ្គាសចេញមកក្រៅ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ