រដ្ឋបាលរាជធានីភ្នំពេញ នៅថ្ងៃទី២៣ ខែកក្កដា ម្សិលមិញនេះ បានចេញសេចក្ដីជូនដំណឹង ស្ដីពីការប្រមូលថ្លៃសេវាប្រមូលសំរាម និងសំណល់រឹងនៅរាជធានីភ្នំពេញ សម្រាប់ខែមិថុនា ឆ្នាំ២០២០។ សេចក្ដីជូនដំណឹងនេះ ត្រូវរដ្ឋបាលរាជធានីភ្នំពេញអះអាងថា ធ្វើឡើងក្រោយរកឃើញថា ប្រជាពលរដ្ឋមួយចំនួនតូចមិនទាន់បានបំពេញកាតព្វកិច្ចបង់ថ្លៃសេវាប្រមូលសំរាមឲ្យបានទាន់ពេលវេលានៅឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងសេចក្ដីជូនដំណឹងរដ្ឋបាលរាជធានីភ្នំពេញបានសង្កត់ធ្ងន់ថា ចំពោះប្រជាពលរដ្ឋម្ចាស់អាជីវកម្ម សេវាកម្ម និងស្ថាប័នឯកជន ដែលពុំទាន់បានទូទាត់បំណុលសរុបថ្លៃសេវាប្រមូលសំរាម និងសំណល់រឹងនៅឡើយ រដ្ឋបាលរាជធានីភ្នំពេញនឹងចេញលិខិតអញ្ជើញរំលឹកជាថ្មីម្ដងទៀត ឲ្យទូទាត់បំណុលរួម។
ហើយប្រសិនបើនៅតែមិនព្រមបង់ថ្លៃសេវាប្រមូលសំរាម និងសំណល់រឹងទៀត រដ្ឋបាលរាជធានីភ្នំពេញ នឹងអនុវត្តន៍វិធានការមួយចំនួនដូចខាងក្រោម៖
១. បញ្ចេញបញ្ជីឈ្មោះ ជាសាធារណៈតាមបណ្ដាញសង្គម ឬតាមប្រព័ន្ធផ្សព្វផ្សាយនានា
២. កត់ត្រាជាបំណុល ហើយអនុវត្តវិធានការរដ្ឋបាល ដោយបិទអាជីវកម្ម ឬសេវាកម្មជាបណ្ដោះអាសន្ន
៣. អនុវត្តវិធានការផ្សេងៗទៀតតាមការចាំបាច់។
សូមបញ្ជាក់ថា កន្លងទៅរដ្ឋបានរាជធានីភ្នំពេញបង្ហើបថា ខ្លួនបានផ្តល់ព័ត៌មានឲ្យពលរដ្ឋម្ចាស់អាជីវកម្ម សេវាកម្ម និងស្ថាប័នឯកជនទាំងអស់ ដែលប្រើប្រាស់សេវាប្រមូលសំរាម និងសំណល់រឹងក្នុងរាជធានីភ្នំពេញតាំងពីថ្ងៃទី ២៥ ឧសភាម្តងរួចមកហើយ ស្តីពីការជំរុញការបង់ថ្លៃសេវាប្រមូលសំរាម។ ក្នុងនោះរដ្ឋបានរាជធានីភ្នំពេញថា ពលរដ្ឋជាច្រើនបានរួសរាន់មកបំពេញកាតព្វកិច្ច ប៉ុន្តែមានពលរដ្ឋមួយចំនួនតូចមិនទាន់បានបំពេញទាន់ពេលកំណត់នៅឡើយ ទើបអាជ្ញាធរត្រូវចាត់វិធានការបែបនេះ៕