ស្ត្រីម្នាក់ រៀបការជាមួយកូនចុងវ័យ២០ឆ្នាំ ក្រោយពីចិញ្ចឹមបីបាច់តាំងពីវ័យ៧ឆ្នាំ និងលែងលះជាមួយប្ដី

រុស្សុី៖ កាលពីសប្ដាហ៍មុននេះ ស្ត្រីម្នាក់មានឈ្មោះថា Marina Balmasheva វ័យ៣៥ឆ្នាំ មកពីតំបន់ Krasnodar Krai ក្នុងប្រទេសរុស្សុី បានរៀបអាពាហ៍ពិពាហ៍ជាមួយកូនប្រុសចុងវ័យ២០ឆ្នាំ ក្រោយពីចិញ្ចឹមបីបាច់តាំងពីវ័យ៧ឆ្នាំម​កម៉្លេះ។

សព្វថ្ងៃនេះ អ្នកស្រី Marina ជាអ្នកល្បីឈ្មោះម្នាក់នៅលើបណ្ដាញសង្គមអុីនស្ដារក្រាម ដែលមាន Follower រហូតដល់ទៅជាង៤២០,០០០នាក់ឯណោះ ដោយសារតែការសម្រកទម្ងន់របស់អ្នកស្រី ធ្វើឲ្យគេឯងស្ងើបសរសើរគ្រប់គ្នា។ ហើយអ្នកស្រីបានរួមរស់ជាមួយអតីតស្វាមីវ័យ៤៥ឆ្នាំ ព្រមទាំងកូនប្រុសចុងអស់រយៈពេលជាង១០ឆ្នាំមកហើយ។

ក្រោយពីលែងលះជាមួយនឹងស្វាមីរួមក អ្នកស្រីក៏បានរកឃើញនូវសេចក្ដីស្នេហាថ្មីមួយ ជាមួយនឹងកូនប្រុសចុងតែម្ដង។ អ្នកស្រី បានទៅការិយាល័យដើម្បីចុះសំបុត្រអាពាពិពាហ៍ជាមួយកូនប្រុសចុង ហើយបន្ទាប់មកទៀតក៏ រៀបចំពិធីអាពាហ៍ពិពាហ៍តូចមួយនៅភោជនីយដ្ឋាន ដែលមានភ្ញៀវចូលរួមយ៉ាងច្រើនផងដែរ។

អ្នកស្រី Marina បានប្រាប់ប្រភពសារព័ត៌មានឲ្យដឹងថា ការរៀបអាពាហ៍ពិពាហ៍ជាមួយកូនប្រុសចុងបែបនេះ គឺមិនមានការប៉ះពាល់ទៅដល់ទំនាក់ទំនងរវាងនរណាម្នាក់ឡើយ ក្នុងចំណោមពួកគេទាំងបីនាក់។

យ៉ាងណាមិញ ឥឡូវនេះ អ្នកស្រី Marina កំពុងរួមរស់ជាមួយកូនប្រុសចុងយ៉ាងមានសេចក្ដីសុខ បើទោះជាមានមតិរិះគន់យ៉ាងណាក៏ដោយ។ ហើយអ្នកស្រី ក៏គ្រោងនឹងមានផ្ទៃពោះឆាប់ៗ និងចង់ផ្លាស់ទៅរស់នៅក្នុងទីក្រុងផងដែរ៕

សូមទស្សនារូបភាពខាងក្រោម៖