ចុមយក្ស! ស្ងាត់ៗ Bayern មកលួចចាប់ចិត្តលើកីឡាករតម្លៃថ្លៃរបស់ Spurs ម្នាក់នេះ

បរទេស៖ យោងតាមប្រភពព័ត៌មានក្នុងប្រទេសបារាំងបានឲ្យដឹងថា ក្លិប Bayern Munich កំពុងត្រៀមធ្វើការផ្ទេរយកខ្សែបម្រើ Tanguy Ndombele របស់ក្លិបមាន់ខ្នាយមាស Tottenham Hotspur។

កីឡាករ Thiago Alcantara និង Javi Martinez ត្រូវបានគេរាយការណ៍មកថា គ្រោងនឹងចាកចេញពី Bayern នាទីផ្សារដូវក្ដៅដ៏ខ្លីខាងមុខនេះ ដោយ Thiago មានដំណឹងលេចឮមកថា អាចផ្លាស់ទៅចូលរួមជាមួយក្លិបហង្សក្រហម Liverpool។

ជាមួយគ្នានេះ ខ្សែបម្រើ Corentin Tolisso ក៏ត្រូវបានគេរំពឹងថា ទំនងជាចែកផ្លូវគ្នាជាមួយនឹងក្លិបយក្សអាល្លឺម៉ង់នៅពេលទីផ្សារដោះដូរបើកទ្វារផងដែរ ដោយជម្រើសជាតិបារាំងរូបនេះ ជាគោលដៅនាំចូលរបស់ក្រុមបិសាចក្រហម Manchester United និង កាំភ្លើងធំ Arsenal។

យ៉ាងណាមិញ យោងតាមការចុះផ្សាយរបស់កាសែត Le10 Sport ក្លិប Bayern Munich សម្លឹងឃើញ Ndombele ជាបេក្ខភាពដែលអាចមកជំនួសកីឡាករទាំង៣រូបខាងលើ។

ប្រភពដដែលបានបន្ថែមទៀតថា ក្រៅពី Ndombele ក្នុងនោះក្លិបជើងឯក Bundesliga ក៏មានគំនិតចង់បានខ្សែបម្រើធ្លាក់កូដរបស់ក្រុម តោខៀវ Chelsea កីឡាករ Tiemoue Bakayoko ផងដែរ។

គួររម្លឹកថា Ndombele ជាកីឡាករដែល Spurs ទិញចូលមកថ្លៃជាងគេប្រចាំប្រវត្តិសាស្រ្តក្លិប ពោលគឺ៦៥លានផោន (ឬប្រមាណ ៨១លានដុល្លារ)។ ដោយឡែកចាប់តាំងពីផ្លាស់ពីក្លិប Lyon កាលពីរដូវក្ដៅឆ្នាំមុនមក ខ្សែបម្រើសញ្ជាតិបារាំងរូបនេះ បង្ហាញខ្លួនសរុបបាន ២៩ប្រកួត ស៊ុតបញ្ចូលទីបាន២គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន៤ដង៕

ប្រភព៖ dailymail