អង់គ្លេស៖ បណ្ដឹងឧទ្ធរណ៍របស់ក្រុមមេឃខៀវ Manchester City ប្រឆាំងនឹងការដាក់បម្រាមមិនឲ្យចូលប្រកួតក្របខណ្ឌ Champions League រយៈពេល២ឆ្នាំ របស់ UEFA បានទទួលជោគជ័យហើយ។ ដូច្នេះមានន័យថា ពួកគេនឹងនៅតែមានសិទ្ធចូលរួមប្រកួតក្នុងពានរង្វាន់ក្លិបអាជីពទ្វីបអឺរ៉ុប រដូវកាលក្រោយៗទៀត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សគួររម្លឹកផងដែរថា Man City ត្រូវបាន UEFA ពិន័យព្យួរឈ្មោះ មិនឲ្យចូលប្រកួត UCL រយៈពេល២រដូវកាល កាលពីខែកុម្ភៈកន្លងទៅ ក្រោយរកឃើញល្មើសនឹងច្បាប់តុល្យភាពហិរញ្ញវត្ថុ (FFP) ដែលច្បាប់នេះ ក្រឹត្យក្រមមិនអនុញ្ញាតឲ្យក្លិបបាល់ទាត់ណាមួយចំណាយលុយហួសកម្រិតនោះទេ។
យ៉ាងណាមិញ ក្រោយធ្វើការប្ដឹងឧទ្ធរណ៍រយៈពេល៣ថ្ងៃ ពេលនេះ Man City ត្រូវបានតុលាការអាជ្ញាកណ្ដាលផ្នែកកីឡា សម្រេចឲ្យរួចផុតពីទោសទណ្ឌរបស់ UEFA ហើយ។
ទោះជាយ៉ាងណាក៏ដោយ បើទោះជាអាចចូលប្រកួតក្នុងក្របខណ្ឌ UCL វិញបាន ប៉ុន្តែ Man City នៅតែត្រូវបង់ថ្លៃពិន័យចំនួន១០លានអឺរ៉ូ (ឬប្រមាណ ១១លានដុល្លារ) ដោយសារមិនបានចូលរួមសហការ កំឡុងពេលដែលចុះស៊ើបអង្កេត៕
ប្រភព៖ sky