ស្អិតណាស់! Chelsea តាមប្រមាញ់តារាកំពុងរះខ្លាំងរបស់ Man Utd រូបនេះមកជំនួស Kepa

អង់គ្លេស៖ ក្លិបតោខៀវ Chelsea ត្រូវបានគេរាយការណ៍មកថាកំពុងតែសម្លឹងតាមទិញកីឡាករ Dean Henderson របស់ក្លិប Manchester United ដែលបច្ចុប្បន្នកំពុងលេងឲ្យក្លិប​ Sheffield United ក្នុងកិច្ចសន្យាខ្ចីជើង ដើម្បីយកមកជំនួសអ្នកចាំទី  Kepa Arrizabalaga ។

អ្នកចាំទីដៃស្អិតសញ្ជាតិអង់គ្លេស Dean Henderson កំពុងតែមានទម្រង់លេងល្អណាស់ជាមួយក្លិប Sheffield នៅរដូវកាលនេះ ដោយក្លិបមួយនេះបានចុះកិច្ចសន្យាខ្ចីជើងរូបគេពី Man Utd កាលពីដើមរដូវកាល ២០១៩/២០។

ហើយកាលពីថ្ងៃសៅរ៍កន្លងទៅ រូបគេបានជួយក្រុម យកឈ្នះក្លិបដែលកំពុងប្រជែងដំណែងលេខ៤ Chelsea ក្នុងលទ្ធផលក្រាស់ក្រែល៣ទល់នឹង០ ដែលធ្វើឲ្យ Henderson បង្កើតកំណត់ត្រាក្នុងការ ការពារមិនឲ្យមានគ្រាប់បាល់បានចំនួន១៣ប្រកួតឲ្យ Sheffield នៅរដូវកាលនេះ។

ជាមួយគ្នានេះដែរតារាឆ្នើមរូបនេះត្រូវបានគេមើលឃើញថាអាចនឹងមកប្រជែងជាមួយកីឡាករជម្រើសទីមួយរបស់ Man Utd គឺអ្នកចាំទី David de Gea នៅរដូវកាលក្រោយបន្ទាប់ពីចប់កុងត្រាខ្ចីជើងជាមួយ Sheffield នោះ។ ប៉ុន្តែវាហាក់ដូចជាមិនទាន់មានភាពច្បាស់លាស់នៅឡើយទេដែលថា Henderson នឹងត្រឡប់មកលេងឲ្យ Man Utd នៅរដូវកាលបន្ទាប់នោះ។  

ដោយឡែកលោកគ្រូបង្វឹក Frank Lampard របស់ក្លិប Chelsea កំពុងតែចាប់ចិត្តចាប់អារម្មណ៍លើកីឡាកររូបនេះ ដើម្បីយកមកជំនួស Kepa ដែលកំពុងធ្លាក់ទម្រង់ខ្លាំង។ យ៉ាងណាមិញ Man Utd ទំនងជាមិនព្រមលក់រូបគេចេញនៅរដូវក្ដៅនេះនោះទេដោយសារតែ Henderson នៅសល់កុងត្រាជាមួយក្លិបរហូតដល់ឆ្នាំ២០២២ ឯណោះ៕

ប្រភព៖ sportsmole