សម្រស់ដ៏ស្រស់ស្អាតនៃដែនកោះ ដែលត្រូវរៀបចំព្រឹត្តិការណ៍ប្រកួត UFC 251 លំដាប់ពិភពលោក

បរទេស៖ UFC បានបញ្ចេញនូវរូបភាពមួយចំនួននៃការរៀបចំព្រឹត្តិការណ៍ប្រកួតលំដាប់ពិភពលោក នៅលើដែនកោះដ៏ស្រស់ស្អាតនៃប្រទេសអារ៉ាប់។ កីឡាករ Jorge Masvidal និង Kamaru Usman បានហោះចេញសំដៅទៅមជ្ឈឹមបូព៌ា សម្រាប់ការប្រកួតរបស់ពួកគេនាសប្តាហ៍នេះ។

កីឡាករទាំងពីរ នឹងត្រូវបានធ្វើតេស្តរកវីរុសកូរ៉ូណាម្តងទៀត នៅពេលពួកគេបានទៅដល់ ហើយត្រូវនៅដោយឡែកក្នុងសណ្ឋាគាររយះពេល២៤ម៉ោង រហូតលទ្ធផលបញ្ជាក់ថាមិនមានបញ្ហាអ្វី ទើបកីឡាករទាំងពីរអាចហ្វឹកហាត់ និងសម្រកគីឡូរបស់ពួកគេ។

 Masvidal និង​ Usman ក៏មានជម្រើសអាចហាត់នៅតាមឆ្នេរសមុទ្រ បន្ទាប់ពីសង្វៀនត្រូវបានតម្លើងរួចរាល់នៅទីនោះ។ ទីលានប្រកួតត្រូវបានរៀបចំតម្លើងឡើងទាំងស្រុង ដើម្បីបិទបាំងបរិយាកាសខាងក្រៅ មិនដូចកាលពីកម្មវិធីមុនៗឡើយ។

ក្រៅពីជំនួបរបស់អ្នកទាំងពីរ ក៏មានគូពិសេសផ្សេងទៀតដូចជា Alexander Volkanovski និងត្រូវប្រកួតការពារខ្សែក្រវ៉ាត់ជាមួយ Max Holloway, ​Jose Aldo ប៉ះ Petr Yan ដើម្បីដណ្តើមខ្សែក្រវ៉ាត់របស់ខ្លួនមកវិញដែលធ្លាប់បាត់បង់ទៅនោះ ក្រៅពីនេះក៏មានគូនារី២គូអមក្នុងការប្រកួតថ្ងៃនោះផងដែរ៕

ប្រភព៖ The Sun