អង់គ្លេស៖ យោងតាមសេចក្ដីរាយការណ៍បានឲ្យដឹងថា ក្លិបកាំភ្លើងធំ Arsenal និងក្លិប Napoli មានគំនិតចង់ផ្ទេរយក តារាឆ្នើមក្លិប Newcastle United កីឡាករ Allan Saint-Maximin នៅទីផ្សារដោះដូររដូវក្ដៅខាងមុខនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែប្រយុទ្ធស្លាបវ័យ២៣ឆ្នាំ បានបង្ហាញទម្រង់លេងយ៉ាងគួរឲ្យចាប់អារម្មណ៍ នៅក្របខណ្ឌ Premier League រដូវកាលនេះ ជាពិសេសគេបានក្លាយជាកីឡាករដ៏លេចធ្លោមួយរូប ក្នុងលីគ ចាប់តាំងពីបាល់ទាត់ មកបន្តសកម្មភាពប្រកួតវិញ ក្រោយផ្អាកដោយសារជំងឺកូវីដ១៩ ពោល៥ប្រកួតចុងក្រោយ គេស៊ុតបាន១គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន៣ដង។
ជាមួយគ្នានេះ បើយោងតាមការចុះផ្សាយរបស់កាសែត Le10 Sport ជើងឯកក្របខណ្ឌ Ligue 1 ក្លិប Paris Saint-Germain មានបំណងចង់បាន Saint-Maximin ទៅរួមក្រុម ក្នុងនោះក្លិប Arsenal និង Napoli ក៏ចាប់អារម្មណ៍ទៅលើម្ចាស់អាវលេខ១០ក្រុម Newcastle រូបនេះផងដែរ។
គួរឲ្យដឹងដែរថា ខ្សែប្រយុទ្ធសញ្ជាតិបារាំងបានផ្លាស់ពីក្លិប Nice មកចូលរួមជាមួយក្រុមរហស្សនាមសារិកាព្រៃ កាលពីរដូវក្ដៅឆ្នាំមុន ក្នុងតម្លៃផ្ទេរ ១៨លានអឺរ៉ូ (ឬប្រមាណ ២០លានដុល្លារ) ខណៈកុងត្រារបស់គេ នៅកីឡដ្ឋាន St. James' Park មានសុពលភាពរហូតដល់ឆ្នាំ២០២៥ឯណោះ៕
ប្រភព៖ dailymail