កោះបាលី ធ្វើពិធីបួងសួងទ្រង់ទ្រាយធំមុនថ្ងៃបើកដំណើរការវិញ បន្ទាប់ពីបិទទ្វារដោយសារកូវីដ-១៩

ឥណ្ឌូណេស៊ី៖ កាលពីថ្ងៃអាទិត្យម្សិលមិញ កោះបាលីបានធ្វើពិធីបួងសួងទ្រង់ទ្រាយធំ ខណៈដែលកោះដ៏ល្បីរបស់ប្រទេសឥណ្ឌូណេស៊ីនេះ​ ត្រៀមនឹងបើកឡើងវិញដើម្បីទទួលភ្ញៀវទេសចរ ក្រោយអាក់ខាងអស់មួយរយៈដោយសារការរីករាលដាលនៃជំងឺកូវីដ-១៩ ។

មនុស្សជាងមួយពាន់នាក់ បានចូលរួមអធិស្ឋាននៅក្នុងបរិវេណនៃប្រាសាទ Besakih Hindu ក្នុងទីប្រជុំជន Karangasem ដើម្បីសម្ដែងការដឹងគុណចំពោះការដោះស្រាយវិបត្ដិវីរុសថ្មីនៅកោះនេះ និងដើម្បីសុំពរជ័យចំពោះការចាប់ផ្ដើមបើកដំណើរការឡើងវិញផងដែរ។

លេខាធិការកោះបាលី លោក Dewa Made Indra បានប្រាប់អ្នកយកព័ត៌មានថា កោះបាលីបានបើកដំណើរការជាបណ្ដើរៗ នៅខែកក្កដានេះ សម្រាប់ភ្ញៀវទេសចរជាតិ។ ចំណែកភ្ញៀវទេសចរអន្ដរជាតិ រដ្ឋាបាលកោះបាលីរំពឹងថា អាចនឹងទទួលក្នុងខែកញ្ញាខាងមុខ។

គួរឲ្យដឹងដែរថា គិតត្រឹមថ្ងៃអាទិត្យម្សិលមិញ កោះបាលីបានរាយការណ៍ពីករណីឆ្លងជំងឺកូវីដ-១៩ ចំនួន ១,៨៤៩នាក់ និងស្លាប់ ២០នាក់ ខណៈប្រទេសឥណ្ឌូណេស៊ីទាំងមូលមានករណីឆ្លងសរុបចំនួន ៦៣,៧៤៩នាក់ និងស្លាប់ ៣,១៧១នាក់ ចាប់តាំងពីដើមខែមីនាមក៕

សូមទស្សនារូបភាពខាងក្រោម៖