គួរឲ្យអាណិតអាសូរណាស់! អគ្គិភ័យបានឆក់យកជីវិតកីឡាការិនីតេក្វាន់ដូ ITF ម្នាក់ នៅខេត្តកំពង់ស្ពឺ

កំពង់ស្ពឺ៖ កីឡាការិនីតេក្វាន់ដូ ITF វ័យ១៨ឆ្នាំម្នាក់ បានបាត់បង់ជីវិតក្នុងហេតុការណ៍ អគ្គិភ័យភ្លើងឆេះផ្ទះមួយកន្លែង កាលពីថ្ងៃអាទិត្យ ១៥កើត ខែអាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៥ ខែកក្កដា ឆ្នាំ២០២០​ វេលាម៉ោង​ ១២:៥៥​ នាទីថ្ងៃត្រង់​ នៅចំណុចភូមិភ្នំដី សង្កាត់ច្បារមន ក្រុងច្បារមន ខេត្តកំពង់ស្ពឺ។

នារីវ័យជំទង់ខាងលើមានឈ្មោះ យ៉ុន សុគន្ធកញ្ញា ដែលជាកីឡាការិនីមួយរូប និងជាយុវជនស្ម័គ្រចិត្ត ស.ស.យ.ក.ខេត្ត។ បើយោងតាមសេចក្តីរាយការណ៍ អគ្គិភ័យនេះបណ្តាលមក ពីផ្ទេរសាំងពីប៊ីដុងមួយទៅពីប៊ីដុងមួយទៀតទើបបណ្ដាលអោយឆាបឆេះ​តែ​ម្ដង ដោយបំផ្លាញទ្រព្យសម្បត្តិទាំងស្រុង និងឆក់យកជីវិតក្មេងស្រីម្នាក់ ដោយសារឈ្លក់នឹងផ្សែងមិនអាចដកដង្ហើមបាន។

ជាមួយគ្នានេះ ពីក្រុមការងារ Khmerload/Keylatop សូមចូលរួមរំលែកទុក្ខ ចំពោះគ្រួសារនៃសព ហើយក៏សូមឲ្យវិញ្ញាណក្ខ័ន្ធរបស់ប្អូនស្រី បានទៅកាន់សុគតិភព កុំបីឃ្លៀងឃ្លាតឡើយ៕