ផ្លូវការហើយ! Leroy Sane បានផ្ទេរដោយជោគជ័យទៅកាន់ក្របខ័ណ្ឌ Bundesliga ក្នុងតម្លៃ...

កីឡាករឆ្នើម Leroy Sane បានចុះកុងត្រាជាផ្លូវការជាមួយក្លិប Bayern Munich ដោយផ្លាស់ពី Manchester City ក្នុងតម្លៃ ៥០ លានអឺរ៉ូ។

បន្ទាប់ពីគាត់ត្រូវបានផ្សារភ្ជាប់ជាមួយក្លិបខាងលើនេះកាលពីរដូវក្តៅមុនពេលដែលគាត់រងរបួសរយៈពេលវែងនៅក្នុងការប្រកួត Community Shield ពេលនេះកីឡករសញ្ជាតិអាល្លឺម៉ង់រូបនេះបាន វិលត្រឡប់មកកាន់ក្របខ័ណ្ឌ Bundesliga ហើយបានចុះកិច្ចព្រមព្រៀងដែលនឹងឈានដល់ឆ្នាំ ២០២៥ ។

នាយកប្រតិបត្តិក្លិបលោក Karl-Heinz Rummenigge មានប្រសាសន៍ថា “យើងពិតជារីករាយណាស់ដែលបានស្វាគមន៍ Leroy Sane មកកាន់ក្រុម Bayern ។ “គាត់គឺជាកីឡាករឆ្នើមម្នាក់ដែលបានបង្ហាញពីគុណសម្បត្តិរបស់គាត់ក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុងក្រុមជម្រើសជាតិ។ “គោលដៅរបស់យើងគឺប្រមូលផ្តុំកីឡាករអាល្លឺម៉ង់ល្អបំផុតមកលេងនៅ Bayern ហើយការចុះហត្ថលេខាលើកីឡាករ Leroy Sane សង្កត់ធ្ងន់ទៅលើគោលដៅមួយនេះផងដែរ។

Sane បាននិយាយថា៖“ Bayern គឺជាក្លិបដ៏អស្ចារ្យមួយដែលមានគោលដៅធំៗ ហើយគោលដៅទាំងនេះក៏ដូចអ្វីដែលខ្ញុំចង់បានផងដែរ។ ខ្ញុំទន្ទឹងរង់ចាំការប្រកួតប្រជែងថ្មី ហើយខ្ញុំសឹងតែមិនអាចរង់ចាំហ្វឹកហាត់ជាមួយក្រុមថ្មីនោះទេ។ ខ្ញុំបានស្គាល់ Hansi Flick កាលពីនៅក្រុមជម្រើសជាតិ U21 ហើយយើងមានទំនាក់ទំនងល្អនឹងគ្នាណាស់។ ខ្ញុំចង់ឈ្នះពានរង្វាន់ឱ្យបានច្រើនតាមដែលអាចធ្វើទៅបានជាមួយ Bayern ហើយជាពិសេសនោះគឺ Champions League ។

Sane នឹងពាក់អាវលេខ ១០ ប៉ុន្តែមិនពាក់អាវនោះសម្រាប់ការផ្សព្វផ្សាយនៃការមកចូលរួមនៅក្លិបថ្មីនេះ ដោយសារតែជាការគោរពដល់ Philippe Coutinho ដែលមិនទាន់ចាកចេញពីក្លិបនោះទេ គឺនៅជួយក្រុមសម្រាប់វគ្គផ្តាច់ព្រ័ត្រ DFB Pokal និងពាន Champions League ផងដែរ ព្រោះ លេខ ១០ ជាលេខរបស់គាត់៕

ប្រភព៖ Marca