អង់គ្លេស៖ ក្លិប Manchester City បានសងសឹកយ៉ាងចាស់ដៃនៅក្នុងទឹកដីរបស់ខ្លួនទៅលើក្រុមម្ចាស់ជើងឯក Liverpool ដោយលទ្ធផល៤ទល់នឹង០កាលពីយប់មិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយ៉ាងណាក្ដីនៅមុនការប្រកួត គេសង្កេតឃើញក្រុមកីឡាកររបស់ Man City បានឈរជារបងកិត្តិយសឲ្យម្ចាស់ជើងឯក Liverpool ដើរចូលទីលាន ។
ក្នុងការប្រកួតនេះ ក្រុមរហស្សនាមហង្សក្រហមបានធ្វើការសម្រុកយ៉ាងខ្លាំងទៅលើក្រុមម្ចាស់ផ្ទះនៅដើមតង់ទី១ ដោយកីឡាករ Mohamed Salah សឹងតែអាចរកបានមួយគ្រាប់មុនទៅហើយ តែបែរជាស៊ុតបុកនឹងបង្គោលទីទៅវិញ។
គ្រាប់បាល់កើតឡើងនៅនាទីទី២៤ដោយបាល់ប៉េណាល់ទី របស់កីឡាករ Kevin De Bruyne ក្រោយពីកីឡាករ Joe Gomez បង្កកំហុសទៅលើ Sterling ដួលក្នុងតំបន់គ្រោះថ្នាក់។ នៅ១០នាទីបន្ទាប់ Sterling ក៏បន្ថែមគ្រាប់ទី២ឲ្យក្លិបរបស់ខ្លួនបានសម្រេច មុនពេលដែលកីឡាករ Phil Forden រកគ្រាប់ទី៣ឲ្យ Man City នៅចុងតង់ទី១។
ចូលដល់តង់ទី២ Liverpool ក៏នៅតែមិនអាចបំបែកពងមាន់របស់ខ្លួនបាន ផ្ទុយទៅវិញ បែរជាត្រូវ Man City បន្ថែមមួយគ្រាប់ទៀតដែលជាគ្រាប់ទី៤នៅនាទីទី៦៦ ដោយការធ្វើឲ្យចូលទីខ្លួនឯងរបស់កីឡាករ Oxlade-Chamberlain ក្រោមការស៊ុត ពីសំណាក់កីឡាករ Raheem Sterling ។
ងាកមកមើលស្ថិតិនៃការគ្រប់គ្រងបាល់វិញគឺក្លិបទាំង២មានភាគរយប្រហាក់ប្រហែលគ្នា ហើយការស៊ុតក៏មិនលើសគ្នាច្រើននោះដែរ ពោលគឺ Man City មានឱកាសស៊ុត១២ជើងចំគោលដៅ៥លើក និងចូលទី៤គ្រាប់។ ចំណែកឯ Liverpool ស៊ុតបាន១១ជើងចំគោលដៅ៣លើកប៉ុន្តែគ្មានសំណាងរកគ្រាប់បាល់បាននោះទេ។ បន្ទាប់ពីការប្រកួតនេះក្លិបទាំង២នៅសល់៦ប្រកួតទៀតដើម្បីបញ្ចប់រដូវកាលរបស់ខ្លួននៅលីគកំពូល Premier League ៕
ប្រភព៖ 90min