៨០លានហើយមិនលក់ទៀត! ក្លិប Rennes បដិសេធសំណើរបស់ Real Madrid ក្នុងការទិញតារាវ័យក្មេងម្នាក់នេះ

បារាំង៖ ក្លិបអធិរាជ​ស Real Madrid ត្រូវបានក្លិបរបស់បារាំង Rennes ប្រាប់ឲ្យទៅរកទិញកីឡាករនៅក្លិបផ្សេងទៀត ក្រោយពីក្លិបមួយនេះបានបដិសេធសំណើ៨០លានអឺរ៉ូ (ឬ៩០លានដុល្លារ) របស់ Real Madrid ដោយថាតម្លៃនេះវាមិនទាន់គ្រប់គ្រាន់នៅឡើយ សម្រាប់តម្លៃខ្លួនកីឡាករ​វ័យក្មេងកំពុងឡើងជើង Eduardo Camavinga ។

ខ្សែបម្រើវ័យ១៧ឆ្នាំ បានបង្ហាញទម្រង់លេងដ៏គួរឲ្យចាប់អារម្មណ៍ជាមួយនឹងក្លិប Rennes នៅក្នុងក្របខ័ណ្ឌ Ligue 1 ដោយចូលលេងសរុបបាន២៥ប្រកួតឲ្យក្លិបនៅរដូវកាលនេះ មុនពេលដែលលីគកំពូលមួយនេះត្រូវបានបិទបញ្ចប់រដូវកាល។

បើទោះបីជាមិនមានសកម្មភាពនៃការប្រកួតបាល់ទាត់សោះក្នុងប្រទេសបារាំងនៅរយៈពេលប៉ុន្មានខែចុងក្រោយនេះក្ដី ក៏លោក Zinedine Zidane នៅតែតាមយ៉ាងស្អិតក្នុងការចរចាទិញកីឡាកររួមសញ្ជាតិនឹងលោករូបនេះមករួមជាមួយ Real Madrid ។

យ៉ាងណាមិញក្លិប Rennes បានធ្វើការបដិសេធនឹងសំណើរបស់ Real Madrid ដោយគិតថា Eduardo នឹងអាចរីកចម្រើនខ្លាំងជាងនេះជាមួយក្លិបនៅពេលប៉ុន្មានឆ្នាំខាងមុខ។ ដោយឡែក កីឡាករជម្រើសជាតិបារាំងអាយុក្រោម២១ឆ្នាំរូបនេះ ក៏មានមហិច្ឆតាចង់ទៅលេងឲ្យក្លិបធំៗនៅទ្វីបអឺរ៉ុប ដូចជាក្លិប Real Madrid នេះផងដែរ៕

ប្រភព៖ 90min