Chelsea ខកខានឡើង Top 3 ក្រោយបរាជ័យក្រោមថ្វៃជើង West Ham ៣-២ (មានវីដេអូ)

ក្រុមតោខៀវ Chelsea បានបាត់បង់៣ពិន្ទុ ក៏ដូចជាខកខានបានឡើង Top 3 ក្នុងកំពូលតារាង Premier League ក្រោយរងការបរាជ័យក្រោមថ្វៃជើងក្រុមបាតតារាង WestHam ក្នុងលទ្ធផល ៣ទល់នឹង២​ក្នុងការប្រកួតដ៏ជក់ចិត្តកាលពីយប់មិញនេះ។

ការប្រកួតបានធ្វើឡើងនៅ London Stadium ទឹកដីរបស់ក្រុមញញ័រទេព WestHam ចាប់ផ្តើមបានប្រហែល ៣៤នាទី ក្រុមម្ចាស់ផ្ទះមានឱកាសនាំមុខមុន១គ្រាប់ តែត្រូវបានអញ្ញាកណ្តាលកាត់សេចក្តីមិនរាប់ជាគ្រាប់បាល់ផ្លូវការ ក្រោយពីបានពិនិត្យ VAR (Video Assistant Referee) ឃើញថាមានកំហុសបច្ចេកទេស។ 

រហូតដល់នាទីទី ៤២ ក្រុមរបស់លោក Larmpard បាននាំមុខ១គ្រាប់វិញដោយបាល់ពិន័យ ១១ ម៉ែត្រ ក្រោមខ្សែការពារ West Ham ធ្វើឲ្យមានកំហុសនៅតំបន់គ្រោះថ្នាក់ ខណៈសម្រេចទីដោយកីឡាករសញ្ជាតិប្រេស៊ីល Willian ។ Chelsea ញញឹមមិនទាន់បានប៉ុន្មាននាទីផង ក្រុមម្ចាស់ផ្ទះក៏បានវាយបកភ្លាមៗបាន១គ្រាប់វិញ ដោយកីឡាករ TomasSoucek នៅនាទី ៤៥ ។

ចូលដល់តង់ទី២ការប្រកួតកាន់តែល្អមើល ក្រុមម្ចាស់ផ្ទះហាក់បន្តដាក់សម្ពាធខ្លាំងលើ Chelsea រហូតរកបាន១គ្រាប់បន្ថែមទៀតនៅនាទីទី៥១ ដោយកីឡាករ Michail Antonio ។ លទ្ធផល ២ទល់នឹង១ បានធ្វើឲ្យការប្រកួតកាន់តែល្អមើល ខណៈ Chelsea ព្យាយាមវាយបកបន្តដើម្បីរកគ្រាប់បាល់ រហូតដល់នាទីទី៧២ ក្រុម Chelsea មានឱកាសទាត់បាល់ Freekick មួយគ្រាប់ ដែលទាត់ដោយ  Willian ដដែលកោងចូលទីយ៉ាងអស្ចារ្យ ធ្វើឲ្យ Chelsea តាមបានស្មើវិញ។

ជិតចប់ការប្រកួតទៅហើយ ក្រុម ទាំង២ មិនទុកជើងឡើងដោយបន្តសម្រុករៀងខ្លួនដើម្បីរកគ្រាប់បាល់ រហូតដល់នាទីទី៨៩ ក្រុមម្ចាស់ផ្ទះរកបាន១គ្រាប់បន្ថែមទៀត ដោយកីឡាករ AndriyYarmolenko ធ្វើឲ្យលទ្ធបានរក្សា ៣ទល់នឹង២ រហូតដល់ចប់ការប្រកួត។

គួរឲ្យដឹងផងដែរថា Chelsea ការបាត់បង់៣ពិន្ទុនេះ បានធ្វើឲ្យក្រុមខ្លួនបន្តឈរនៅ Top 4 កំពូលតារាង ខណៈមានគម្លាតតែ២ពិន្ទុប៉ុណ្ណោះពីក្រុមឈរលេខ៥ Manchester United ៕

ចង់ដឹងការប្រកួតជក់ចិត្តយ៉ាងណា សូមទស្សនាវីដេអូ Highlight ខាងក្រោម៖