ចរចាជិត២ឆ្នាំមិនត្រូវគ្នា គ្រូធំ Man City បានត្រឹមតែជូនពរសិស្សសំណព្វរបស់ខ្លួនម្នាក់បែបនេះ

គ្រូធំក្លឹបមេឃខៀវ Manchester City លោក Pep Guardiola បានជូនពរកីឡាករតំបន់ប្រយុទ្ធរបស់ខ្លួន កីឡាករ Leroy Sane ខណៈដែលតារាឆ្នើមរូបនេះនឹងផ្ទេរទៅក្លឹប Bayern Munich ក្នុងតម្លៃខ្លួន ៥៤.៨លានផោន។

តារាឆ្នើមវ័យ២៤ឆ្នាំរូបនេះបានធ្វើការផ្សាភ្ជាប់ជាហូរហែក្នុងការផ្ទេរត្រលប់ទៅលេងនៅអាល្លឺម៉ង់វិញដែលជាទឹកដីកំណើតរបស់ខ្លួន ដែលធ្វើឲ្យក្រុម Man City បោះបង់ក្តីសង្ឃឹមស្ទើរទាំងអស់ក្នុងការចងជើងកីឡាកររូបនេះឲ្យបន្តលេងនៅអង់គ្លេស ខណៈដែលកន្លងមកមានការចរចាឲ្យ Sane បន្តកុងត្រានៅ Man City ជិត២ឆ្នាំមកហើយរវាងកីឡាករជាមួយក្លឹបផ្ទាល់។

កីឡាករជម្រើសជាតិអាល្លឺម៉ង់រូបនេះនឹងចុះកុងត្រារយៈពេល ៥ឆ្នាំ ជាមួយក្រុមគ្រងជើងឯកលីគកំពូលអាល្លឺម៉ង់ Bayern Munich ។ គ្រូធំ Man City លោក Pep Guardiola បានថ្លែងឲ្យដឹង ថា៖ "វានៅតែនៅមានរឿងរ៉ាវខ្លះ ប៉ុន្តែមើលទៅគាត់ប្រាកដជាផ្ទេរទៅ Bayern Munich ហើយ។ យើងជូនពរឲ្យគាត់ជោគជ័យ ហើយក៏អរគុណសម្រាប់ពេលវេលាដែលបានចំណាយជាមួយគ្នាកន្លងមក ហើយជូនពរគាត់ឲ្យជោគជ័យក្នុងទំព័រជីវិតថ្មីជាមួយក្លឹបថ្មីរបស់គាត់។" 

Pep បន្តទៀតថា៖​ "គាត់ចង់ចាកចេញទៅ។ គ្រប់គ្នាមានជីវិតរបស់ពួកគេ។ គាត់សក្តិសមក្នុងការបន្តទៅមុខ។ ខ្ញុំពិតជាចង់ឲ្យគាត់បន្តនៅជាមួយយើង ប៉ុន្តែគាត់បានសម្រេចចិត្តធ្វើដំណើរទៅមុខ ព្រោះគាត់ជឿថា គាត់នឹងមានក្តីសុខជាង ពេលគាត់ទៅដល់ Munich"៕  

ប្រភព៖ skysports