ចុមៗ! Cheslea គ្រោងបញ្ចេញខ្សែបម្រើជម្រើសជាតិបារាំងរូបនេះ ដើម្បីប្រមូលលុយទិញយក Havertz

អង់គ្លេស៖ ក្លិបតោខៀវ Chelsea ត្រូបានគេរាយការណ៍មកថា មានគម្រោងបញ្ចេញខ្សែបម្រើ Tiemoue Bakayoko ដើម្បីប្រមែប្រមូលថវិការមកបង្រ្គប់ទិញខ្សែប្រយុទ្ធស្លាបកំពុងឡើងកូដរបស់ក្រុម Bayer Leverkusen កីឡាករ Kai Havertz។

Bakayoko ហាក់មិនជោគជ័យនោះទេជាមួយ Chelsea ចាប់តាំងពីគេផ្លាស់ពីក្លិប Monaco ក្នុងឆ្នាំ២០១៧មក។ ចំណាយពេលបានត្រឹម ១រដូវកាលនៅកីឡដ្ឋាន Stamford Bridge គេក៏បានផ្ទេរទៅក្របខណ្ឌ​ Serie A ដោយចូលរួមជាមួយក្រុម AC Milan ក្នុងកិច្ចសន្យាខ្ចីជើង បន្ទាប់មក ក្នុងរដូវកាលនេះ គេក៏បានបន្តខ្ចីជើងទៅក្លិបចាស់របស់គេវិញ Monaco ខណៈដើមខែកក្កដា ឆ្នាំ២០២០នេះ គេបានវិលត្រឡប់មក Chelsea វិញហើយ។

ខ្សែបម្រើសញ្ជាតិបារាំង នៅសល់កុងត្រារយៈពេល២ឆ្នាំទៀតជាមួយក្រុមលោក Frank Lampard ប៉ុន្តែក្លិបនៅភាគលិចទីក្រុងឡុដ៍មួយនេះ មិនចង់រក្សាទុករូបគេរហូតដល់ផុតកិច្ចសន្យានោះទេ ដោយគ្រោងលក់រូបគេ នាពេលឆាប់ៗខាងមុខ ដើម្បីទទួលបានថវិការខ្លះ។

ជាក់ស្ដែងបើយោងតាមការចុះផ្សាយរបស់កាសែត​ Express ក្លិប Chelsea រំពឹងថានឹងទទួលបាន១៨លានផោន ពីការលក់ខ្សែបម្រើវ័យ២៥ឆ្នាំ​ ដើម្បីយកថវិការនេះ ទៅបង្វិលទិញកីឡាករ Havertz។

គួរឲ្យដឹងដែរថា Chelsea ទើបតែទិញបានកីឡាករឆ្នើម២រូបមករួមក្រុម ដើម្បីត្រៀមតតាំងជាមួយក្រុមផ្សេងៗនៅរដូវកាលក្រោយ ក្នុងនោះពួកគេទិញបានខ្សែបម្រើ Hakim Ziyech ពីក្លិប Ajax និង ខ្សែប្រយុទ្ធ Timo Werner របស់ក្លិប RB Leipzig ។

ដោយឡែកសម្រាប់ គោលដៅបន្ទាប់របស់ Chelsea ដែលកំពុងតាមប្រមាញ់រួមមានខ្សែការពារក្រុម Bayern Munich កីឡាករ David Alaba ម្ចាស់អាវលេខ៣ក្រុម Leicester City កីឡាករ Ben Chilwell និង ខ្សែប្រយុទ្ធវ័យក្មេង Havertz ខាងលើនេះឯង៕

ប្រភព៖ sportsmole