រុស្ស៊ីរងការចោទប្រកាន់ ថា​​បានផ្តល់​ជំនួយដល់ក្រុមសកម្មប្រយុទ្ធ​ ដើម្បីសម្លាប់កងទ័ពសហរដ្ឋអាមេរិក​

វ៉ាស៊ីនតោន៖ ទីភ្នាក់ងារសារព័ត៌មាន ញូវយ៉កថែមស៍ បានរាយការណ៍​​​ថា អង្គភាពស៊ើបការណ៍សម្ងាត់របស់សហរដ្ឋអាមេរិកបាន​សន្និដ្ឋានថា យោធារុស្ស៊ីគឺជាអ្នកផ្តល់​​ជំនួយ ដល់​ក្រុមសកម្មប្រយុទ្ធ​តាលីបង់នៅក្នុងប្រទេសអាហ្វហ្គានីស្ថាន ក្នុងគោលបំណង​សម្លាប់កងទ័ពអាមេរិក និងកងកម្លាំងចម្រុះផ្សេងទៀត។

ប្រភពដដែលបានបន្តថា ​យោធារុស្ស៊ីគឺមានទំនាក់ទំនងជិតស្និទ ហើយតែងផ្តល់ជារង្វាន់ដល់ក្រុមសកម្មប្រយុទ្ធ​ ក៏ដូចជាក្រុមឧក្រិដ្ឋជនប្រដាប់អាវុធផ្សេងទៀត នៅពេលបេសកកម្មវាយប្រហារគោលដៅណាមួយទទួលបានជោគជ័យ។ ក៏ប៉ុន្តែទោះជាបីជាយ៉ាងណាក្តី ក្រសួងការបរទេសរុស្ស៊ីបាន​ចេញមុខបដិសេធការលើកឡើងនេះ ហើយតបទៅវិញថា ទីភ្នាក់ងារស៊ើបការណ៍សម្ងាត់អាមេរិក មិនមានសមត្ថភាពគ្រប់គ្រាន់ រួមទាំងមានការយល់ដឹងតិច។

គួរ​ឱ្យដឹងផងដែរថា កាលពីឆ្នាំ ២០១៩ មានទាហានអាមេរិកយ៉ាងហោចណាស់ ២០នាក់ ត្រូវបាន​​សម្លាប់នៅក្នុងការប្រយុទ្ធជាមួយពួកតាលីបង់​។ ​ហើយបច្ចុប្បន្ន​ ​អង្គភាពស៊ើបការណ៍សម្ងាត់អាមេរិក កំពុងធ្វើការសិក្សាឱ្យបានកាន់តែច្បាស់លើ​បញ្ហានេះ ចំណែកសេតវិមានក៏មិនទាន់​ផ្តល់សិទ្ធិឱ្យចាត់វិធានការណាមួយប្រឆាំងនឹងប្រទេសរុស្ស៊ី ​ដែលជាអ្នកនៅពីក្រោយខ្នងក្រុមសកម្មប្រយុទ្ធនោះ​ដែរ៕