ម៉ិកស៊ីកូ៖ អាជ្ញាធរប្រទេសម៉ិកស៊ិកបានរាយការកាលពីថ្ងៃពុធថា ចំនួនអ្នកស្លាប់ដោយសារគ្រោះរញ្ជួយដីដ៏ខ្លាំងក្លាមួយនៅកណ្តាលរដ្ឋ Oaxaca ភាគខាងត្បូងប្រទេសម៉ិកស៊ិកកាលពីថ្ងៃអង្គារ បានកើនឡើងដល់ទៅ ១០ នាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សគ្រោះរញ្ជួយដីកម្រិត ៧.៤ រ៉ិចទ័រ ដែលវាយប្រហារក្នុងប្រទេសម៉ិកស៊ិកនេះ បានធ្វើឱ្យកក្រើកនៅតំបន់កម្សាន្តដ៏ពេញនិយមមួយចំនួនក្នុងរដ្ឋ Oaxaca ហើយមនុស្សជាច្រើនបានរត់ប្រសាចចេញពីអគារ និង ផ្ទះសម្បែង ដើម្បីជៀសវាងគ្រោះថ្នាក់នៅពេលវាបាក់រលំ។
យោងតាមអាជ្ញាធររដ្ឋ Oaxaca បានឱ្យដឹងថា ផ្ទះប្រជាពលរដ្ឋប្រមាណ ៥០០០ ខ្នង បូករួមទាំង មជ្ឈមណ្ឌលអប់រំ និងទីតាំងប្រវត្តិសាស្ត្រ ក៏ដូចជាតំបន់បុរាណវិទ្យាចំនួនបួន ត្រូវបានរងការខូចខាត។
គួរជម្រាបផងដែរថា ម៉ិកស៊ិកគឺជាប្រទេសមួយក្នុងចំណោមប្រទេស ដែលងាយរងគ្រោះដោយសារគ្រោះរញ្ជួយដី ក៏ព្រោះតែប្រទេសនេះ ស្ថិតនៅត្រង់ចំណុចប្រសព្វនៃផ្លាកចលនាតិចតូនិចផែនដី៕