ការ​គេង​ស្រមុក​អាច​កើត​លើ​យើង​គ្រប់គ្នា​ ប៉ុន្តែ​ប្រសិនជា​យើង​គេង​ស្រមុក​រាល់ថ្ងៃ នេះ​​អាច​ជា​បញ្ហព្រោះ​យើង​អាច​នឹង​មាន​អារម្មណ៍​ហត់ និង​រំខាន​ដំណេក​ដៃគូ​ផង​ដែរ។

១. មូលហេតុ​នៃ​ការ​គេង​ស្រមុក

ការ​គេង​ស្រមុក​អាច​បង្ក​មក​ពី​មូលហេតុ​ខាងក្រោម​នេះ៖

- អាយុ៖ នៅ​ពេល​ឈាន​ចូល​វ័យ​ចំណាស់ បំពង់ក​នឹង​តូច​ជាងមុន ហើយ​ចលនា​កន្ត្រាក់​សាច់ដុំ​នៅពេល​នៅស្ងៀម​ក៏​ថយ​ចុះ។

- ការ​លើស​ទម្ងន់៖ ការ​លើស​ទម្ងន់​បង្ក​ឲ្យ​មាន​ជាលិកា​ខ្លាញ់​ច្រើន និង​គេង​ស្រមុក។

- រូបរាង​ពីកំណើត៖ បុរស​ច្រើន​គេង​ស្រមុក​ជាង​ស្ត្រី​នេះ​មក​ពី​ផ្លូវ​ដង្ហើម​បុរស​តូចជាង​ស្ត្រី ឬ​អាច​មកពី​កត្តា​ផ្សេង​ទៀត​ដូចជា​បំពង់​ក​ចង្អៀត ការ​រីកក្រពេញ adenoid និង​ឆែបមាត់​ជាដើម។​

- បញ្ហា​ច្រមុះ និង​តំបន់​ sinus៖ អាការៈ​តឹង​ច្រមុះ​ ឬ​ស្ទះ​ផ្លូវ​ដង្ហើម​អាច​បណ្ដាល​ឲ្យ​គេង​ស្រមុក។

- ផឹក​គ្រឿង​ស្រវឹង និង​ជក់បារី៖ ការ​គេង​ស្រមុក​អាច​បង្ក​ដោយ​ការ​ផឹក​គ្រឿង​ស្រវឹង​ច្រើន​ និង​ជក់បារី​ច្រើន​ព្រោះ​នេះ​ធ្វើ​ឲ្យ​សាច់ដុំ​មាន​ភាព​ធូរ​ស្រាល។

- ឥរិយាបថ​នៃ​ការ​គេង៖ ការ​គេង​ផ្ងារ​អាច​បណ្ដាល​ឲ្យ​សាច់​បំពង់ក​បិទ​ផ្លូវ​ដង្ហើម​អាចនាំឲ្យគេង​ស្រមុក​ដែរ​។

២. វិធី​ដោះស្រាយ​បញ្ហា​គេងស្រមុក

ក្រោយពី​ដឹង​ពី​មូលហេតុ​បង្ក​ហើយ ខាង​ក្រោម​នេះ​ជា​តិចនិក​មួយ​ចំនួន​ដែល​អាច​ជួយ​បង្ការ​ការ​គេង​ស្រមុក​បាន​។ ប៉ុន្តែ​ប្រសិនជា​យើង​បន្ត​មាន​បញ្ហា​នេះ​កើត​ឡើង​ និង​ប៉ះពាល់​ដល់​ការ​រស់នៅ​ប្រចាំ​ថ្ងៃ យក​ល្អ​គួរ​ទៅ​ពិគ្រោះ​ជាមួយ​គ្រូពេទ្យ។

រក្សា​ទម្ងន់

ប្រសិនជា​គ្នាយើង​ចាប់​អារម្មណ៍​ថា​យើង​ចាប់ផ្ដើម​គេង​ស្រមុក​ក្រោយ​ពី​យើង​ឡើង​ទម្ងន់ ការ​សម្រក​ទម្ងន់​អាច​ដោះស្រាយ​បញ្ហា​នេះ​បាន​ព្រោះ​អាច​បញ្ចុះ​ជាលិកា​ខ្លាញ់​នៅ​ក្នុង​បំពង់​ក​ដែល​បិទ​ផ្លូវ​ដង្ហើម។

ឈប់​ជក់បារី និង​ផឹក​គ្រឿង​ស្រវឹង

គ្រឿងស្រវឹង​អាច​បន្ធូរ​សាច់ដុំ​បំពង់ក​ដែល​ធ្វើ​ឲ្យ​ពិបាក​ដល់​ការ​ដកដង្ហើម ដូចនេះ​គួរ​ចៀសវាង​ផឹក​គ្រឿង​ស្រវឹង​មុន​ពេល​ចូល​គេង។ ម៉្យាងទៀត បើ​គ្នា​យើង​មួយ​ចំនួន​ជក់​បារី ហើយគេង​ស្រមុក​ជា​ប្រចាំ​គួរ​ពិចារណា​ឈប់​ជក់​បារី​ព្រោះ​ជក់បារី​អាច​ធ្វើ​ឲ្យ​ភ្នាស​នៅ​ច្រមុះ និង​បំពង់ក​រលាក​ដែល​ស្ទះ​ផ្លូវ​ដង្ហើម​ និង​បង្ក​ឲ្យ​គេង​ស្រមុក។

សម្អាត​បន្ទប់គេង និង​ផ្លាស់ប្តូរ​ឥរិយាបថ​នៃ​ការ​គេង

បើ​គេង​ផ្ងារ​ធ្វើ​ឲ្យ​យើង​គេង​ស្រមុក យើងគួរ​គេង​ចំហៀង​វិញ ឬ​​អាច​សាក​ប្រើ​ខ្នើយ​ដើម្បី​បង្ការ​មិន​ឲ្យ​យើង​គេង​ផ្ងារ។ សម្រាប់​គ្នា​យើង​មាន​បញ្ហា​អាលែកហ្សី យើង​គួរ​សម្អាតស្រោម​ខ្នើយ​ជាប្រចាំ និង​ផ្លាស់​ប្ដូរ​ខ្នើយ​រាល់​៦ខែ​ម្ដង​។

សម្អាត​រន្ធច្រមុះ

អាការៈ​តឹង​ច្រមុះ​ពេល​ផ្ដាសាយ ឬ​ដោយសារ​មូលហេតុ​ផ្សេង​អាច​ធ្វើ​ឲ្យ​យើង​គេង​ស្រមុក ហើយ​ការ​សម្អាត​រន្ធ​ច្រមុះ​​​ដោយ​សេរ៉ូម​ប្រៃ​ និង​ការ​ងូតទឹក​ក្ដៅ​អាច​ជួយ​បាន។

របប​អាហារ​មុន​ពេល​ចូល​គេង

ការស្រាវជ្រាវ​បង្ហាញ​ថា​ការ​ញ៉ាំ​អាហារ​ច្រើន​ ឬ​ញ៉ាំ​អាហារ​ដូចជា​ផលិតផល​ទឹកដោះគោ ឬ​ទឹកសណ្ដែក​មុន​ពេល​ចូល​គេង​អាច​ធ្វើ​ឲ្យ​គេង​ស្រមុក​កាន់តែ​ខ្លាំង។​ ដូចនេះ​គួរ​ចៀស​វាង​អាហារ​ប្រភេទ​នេះ។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សម្រស់ & សុខភាព និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ