អង់ការ៉ា៖ ប្រធានការិយាល័យ ឧស្សាហកម្មការពារជាតិរបស់ប្រទេសតួកគី បានឱ្យដឹងថា ប្រទេសតួកគីនឹងទិញប្រព័ន្ធមីស៊ីលការពារដែនអាកាសប្រភេទ S-400 ដែលផលិតដោយរុស្ស៊ីបន្ថែមទៀត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងបទសម្ភាសន៍តាមទូរទស្សន៍កាលពីដើមសប្តាហ៍នេះ លោក Ismail Demir បានលើកឡើងយ៉ាងដូច្នេះថា៖
តួកគីបានចុះកិច្ចព្រមព្រៀងទំហំ ២.៥ពាន់លានដុល្លារ ដើម្បីទិញប្រព័ន្ធមីស៊ីលការពារដែនអាកាស S-400 រុស្ស៊ីកាលពីខែធ្នូ ឆ្នាំ២០១៧។ ហើយកាលពីថ្ងៃទី២៥ ខែកក្កដា ឆ្នាំ ២០១៩កន្លងទៅ រុស្ស៊ីបានបញ្ចប់ដំណើរការ ប្រគល់ប្រព័ន្ធមីស៊ីលការពារដែនអាកាស ដំណាក់កាលដំបូងមកឲ្យតួកគី។
ប៉ុន្តែទោះបីជាយ៉ាងណាក្តី កិច្ចព្រមព្រៀងរវាងតួកគីនិងរុស្ស៊ីនេះ បានធ្វើឱ្យសហរដ្ឋអាមេរិកមិនសប្បាយចិត្ត ដោយរដ្ឋធានីវ៉ាស៊ីនតោនបានទាមទារឱ្យតួកគីឈប់ទិញប្រព័ន្ធមីស៊ីលការពារដែនអាកាសរបស់រុស្ស៊ី ហើយងាកមកទិញប្រព័ន្ធមីស៊ីលការពារដែនអាកាសរបស់អាមេរិកជំនួសវិញ។ លើសពីនេះទៀត សហរដ្ឋអាមេរិកក៏បានព្រមានថា នឹងពន្យារពេល ឬលុបចោលការលក់យន្តហោះចម្បាំង F-35 ទៅឱ្យប្រទេសតួកគី ហើយថែមទាំងដាក់ទណ្ឌកម្មមកលើប្រទេសតួកគីបន្ថែមទៀត។
គួរឱ្យដឹងផងដែរថា ប្រព័ន្ធមីស៊ីលការពារដែនអាកាសប្រភេទ S-400 ត្រូវបានផលិតឡើង ដើម្បីប្រឆាំងនឹងយន្តហោះ និងមីស៊ីលផ្លោង ដោយប្រព័ន្ធមីស៊ីលប្រភេទនេះ អាចចាប់ទីតាំងរបស់សត្រូវ នៅរយៈចម្ងាយ ៤០២គីឡូម៉ែត្រ ឬ រយៈកំពស់រហូតដល់ទៅ ២៨គីឡូម៉ែត្រ៕
សូមទស្សនាវីដេអូបង្ហាញពីដំណើរការប្រព័ន្ធមីស៊ីលការពារដែនអាកាស S-400 របស់រុស្ស៊ី៖