មិនចង់ឡើងគីឡូមែនទេ? វិធីសាមញ្ញៗ ៥ យ៉ាងនេះអាចធ្វើឱ្យអ្នកញ៉ាំអាហារតិចជាងមុន

ជឿជាក់ថាមនុស្សនៅក្នុងសម័យនេះភាគច្រើនមិនអាចឃាត់ចិត្តខ្លួនឯងបាននោះទេចំពោះការញុំាអាហារប្រចាំថ្ងៃនេះ។ ចិត្តចង់ញុំាតែបន្តិចឲ្យឆ្អែតមួយពេលដើម្បីកុំឲ្យឡើងគីឡូខ្លាំងពេក។ ប្រសិនជាធ្វើបែបនេះពិតជាមិនងាយស្រួលនោះទេ ពិបាកឃាត់ចំណង់ខ្លួនឯងណាស់ ដូច្នេះមានតែត្រូវញ៉ាំរហូតទាល់តែឆ្អែត។ ជាការពិតណាស់ប្រសិនបើញ៉ាំច្រើនលើសកម្រិតក្នុងមួយពេលៗ វានឹងត្រូវធ្វើឲ្យធាត់ និងឡើងគីឡូជាក់ជាមិនខាន មិនត្រឹមតែប៉ុណ្ណោះក៏អាចប្រឈមជំងឺផ្សេងៗដែលនឹងកើតមានឡើងផងដែរ។

ខាងក្រោមនេះគឺជាល្បិចសាមញ្ញៗ ៥ យ៉ាងដែលអាចធ្វើឱ្យអ្នកញ៉ាំអាហារតិចជាងមុន ប៉ុន្តែអាចឆ្អែតពេញមួយពេល៖

១. ញ៉ាំអាហារឱ្យទាន់ពេលវេលា

ជាការពិតរបបអាហារមិនមែនជាដំណោះស្រាយសម្រាប់មនុស្សដែលចង់ស្គមឡើយ ព្រោះវាអាចនឹងធ្វើឱ្យអ្នកកាន់តែឃ្លានជាងមុន និងជាពិសេសការតមអាហារពេលល្ងាចនេះ វាកាន់តែធ្វើឱ្យអ្នកឃ្លាននៅពេលយប់។ អ្វីដែលអ្នកគួរធ្វើ កុំតមអាហារ គឺត្រូវញ៉ាំឲ្យបានគ្រប់ ៣ ពេលក្នុងមួយថ្ងៃ ប៉ុន្តែត្រូវតែជ្រើសរើសអាហារដែលផ្តល់ថាមពលទាបនៅពេលល្ងាច ដោយសារតែពេលនោះជាពេលវេលាកៀកនឹងចូលគេងហើយ។

២. ទំពាអាហារយឺតៗ

វិធីងាយៗធ្វើឱ្យអ្នកមានអារម្មណ៍ឆ្អែតបានលឿន គឺបង្កើនពេលវេលាទំពាអាហារឲ្យបានច្រើនជាងមុនក្នុងមួយពេល។ ជាទូទៅមនុស្សគ្រប់គ្នាមិនសូវជាចំណាយពេលយូរនោះទេ ភាគច្រើនឃើញញ៉ាំអាហាររហ័សណាស់ ទំពាតែពីរទៅបីដងរួចលេបហើយ ទម្លាប់បែបនេះនឹងធ្វើឲ្យអ្នកញ៉ាំបានច្រើនព្រោះអាហារមិនទាន់ចូលក្នុងក្រពះនោះទេ។ ប៉ុន្តែប្រសិនបើយើងចំណាយពេលច្រើនក្នុងការទំពាអាហារយឺតៗ នោះភាគល្អិតនៃអាហារនឹងចូលដល់ក្នុងក្រពះ និងសម្រួលដល់ការរំលាយអាហារបានល្អ មិនតែប៉ុណ្ណោះអ្នកនឹងមានអារម្មណ៍ថាឆាប់ឆ្អែតផងដែរ។

៣. បរិភោគក្នុងបរិមាណតិច

ព្យាយាមបរិភោគអាហារក្នុងបរិមាណតិចប្រចាំថ្ងៃ ដោយការជ្រើសរើសចានតូចល្មម និងត្រូវដាក់បាយជាមួយម្ហូបបន្តិចបានហើយ។ មិនត្រូវជ្រើសរើសចានធំ និងដាក់អាហារទៅតាមបរិមាណនៃចាននោះទេ។ ការធ្វើបែបនេះគឺជាទម្លាប់មួយដ៏ល្អ និងដឹងពីបរិមាណនៃរបបអាហារប្រចាំថ្ងៃរបស់អ្នក។

៤. មានចំណង់ឃ្លានអាហារគ្រប់ពេល

អ្នកកំពុងញុំាអាហារ មិនត្រូវធ្វើសកម្មភាពផ្សេងៗទៀតស្របពេលគ្នាឡើយដូចជា ការមើលភាពយន្ត, លេងទូរសព្ទដៃ ឬអង្គុយធ្វើការនៅមុខកុំព្យូទ័រដោយគ្មានពេលវេលាកំណត់។ ការធ្វើបែបនេះនឹងធ្វើឱ្យអ្នកសប្បាយចិត្តនឹងការញ៉ាំរហូតដល់អ្នកមិនអាចបញ្ឈប់ការញុំា និងមិនដឹងថាខ្លួនឯងឆ្អែតនោះទេ។

ដូច្នេះជាទម្លាប់មួយដ៏ល្អ អ្នកត្រូវតែថ្លឹងថ្លែងបរិមាណអាហារដែលគិតថាល្មមឆ្អែត និងមិនចាំបាច់បន្ថែមអាហារនោះទេ។ អ្នកគួរតែអង្គុយហើយបរិភោគដោយប្រយ័ត្នប្រយែងនិងចំណាយពេលបន្តិចដើម្បីទំពាអាហារឲ្យបានម៉ត់ល្អ។ មួយវិញទៀតអ្នកគួរតែជ្រើសរើសអាហារដែលរំលាយបានយូរដើម្បីមិនឆាប់ឃ្លានដូចជា អង្ករសម្រូប នំបុ័ងស្រូវសាលី និងអាហារដែលសំបូរជាតិប្រូតេអ៊ីនមានដូចជា ស៊ុត ត្រី និងគ្រាប់ធញ្ញជាតិ។

៥. របបអាហារ និងការធ្វើលំហាត់ប្រាណ

ប្រសិនបើចង់គ្រប់គ្រងទម្ងន់បានល្អ កុំភ្លេចគ្រប់គ្រងរបបអាហាររបស់អ្នកប្រចាំថ្ងៃ និងកុំញុំាឲ្យលើសកម្រិតដែលរាងកាយមិនអាចទទួលយកបាន។ កាត់បន្ថយអាហារដែលមានជាតិកាបូនអ៊ីដ្រាត ដោយបន្ថែមអាហារដែលសំបូរទៅដោយជាតិសរសៃដូចជា បន្លែ ផ្លែឈើ។ បរិភោគអាហារដែលមានជាតិខ្លាញ់ល្អដូចជា ត្រីសមុទ្រ ស៊ុត ប្រេងអូលីវ និងធ្វើលំហាត់ប្រាណជាប្រចាំ៕