បរទេស៖ មជ្ឈមណ្ឌលសិក្សាវត្ថុនៅជិតផែនដី (CNEOS) របស់អង្គការណាសា បានរាយការណ៍ថា អាចម៍ផ្កាយដ៏ធំមួយ ដែលមានកំពស់ខ្ពស់ជាងអាគារ Empire State Building នឹងហោះចូលមកគន្លងផែនដីនៅសប្តាហ៍នេះ ប៉ុន្តែវានឹងមិនមានការប៉ះទង្គិចជាមួយផែនដីនោះទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ទីភ្នាក់ងារអវកាសរបស់អង្គការណាសា បានហៅឈ្មោះអាចម៍ផ្កាយនោះថា 163348 (2002 NN4) ដែលប្រវែងមុខកាត់ប្រមាណ ៥៧០ម៉ែត្រ ហើយវានឹងហោះមកជិតផែន នៅថ្ងៃសៅរ៍ទី ៦ មិថុនា ក្នុងល្បឿន ៥,២គីឡូម៉ែត្រក្នុងមួយវិនាទី ឬ ១១,២០០ ម៉ាយក្នុងមួយម៉ោង ដោយស្ថិតនៅរយៈចម្ងាយប្រហែល ៥,១ លានគីឡូម៉ែត្រពីផែនដីរបស់យើង។
សូមជម្រាបផងដែរថា អាចម៍ផ្កាយ 163348 (2002 NN4) ត្រូវបានរកឃើញតាំងពីឆ្នាំ ២០០២មកម៉្លេះ ហើយបច្ចុប្បន្នទីភ្នាក់ងារអវកាស និងក្រុមតារាវិទូរបស់អង្គការណាសា បាននឹងកំពុងតាមដានអាចម៍ផ្កាយជិតធំៗ ២,០០០ ដែលរួមបញ្ចូលទាំងផ្កាយដុះកន្ទុយ និងវត្ថុផ្សេងៗទៀត ដែលបង្កគំរាមកំហែងដល់ភពផែនដីយើង។ ទទន្ទឹមនឹងនេះ ក្រុមអ្នកជំនាញរបស់អង្គការណាសា ក៏បានព្យាករណ៍ដែរថា អាចម៍ផ្កាយធំៗចំនួន ៣០ នឹងហោះកាន់តែកៀកជិតផែនដីយើងបំផុតនាពេលអនាគត៕
Bong I.T