ផ្លូរីដា៖ បេសកកម្មប្រវត្តិសាស្ត្ររបស់អង្គការ NASA និង ក្រុមហ៊ុន SpaceX ក្នុងការបញ្ជូនយានផ្ទុកមនុស្សឡើងទៅស្ថានីយ៍អវកាស កាលពីថ្ងៃពុធម្សិលមិញនេះ ត្រូវបានផ្អាកជាបណ្តោះអាសន្នសិន ដោយសារអាកាសធាតុមិនអំណោយផល ដែលវាអាចបង្កគ្រោះថ្នាក់ ខណៈពេលចេញដំណើរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការបាញ់បង្ហោះយានផ្ទុកមនុស្សឡើងទៅស្ថានីយ៍អវកាសចេញពីទឹកដីសហរដ្ឋអាមេរិកនេះ គឺជាបេសកកម្មក្នុងប្រវត្តិសាស្ត្រមិនធ្លាប់មានជិត ១០ឆ្នាំ បន្ទាប់ពីកម្មវិធី Space Shuttle របស់អង្គការ NASA ត្រូវបានបិទកាលពីឆ្នាំ ២០១១។ ហើយចាប់តាំងពីពេលនោះមក អវកាសយានិកអាមេរិករបស់អង្គការ NASA ត្រូវបានបញ្ជូនឡើងទៅស្ថានីយ៍អវកាស ដោយពឹងផ្អែកលើយាន Soyuz របស់អង្គការអវកាសរុស្ស៊ី ដែលមានតម្លៃប្រមាណ ៨៦ លានដុល្លារសម្រាប់មួយកៅអី។
គួរឱ្យដឹងផងដែរថា សំរាប់កាលបរិច្ឆេទបាញ់បង្ហោះបន្ទាប់ អង្គការ NASA គ្រោងកំណត់យកថ្ងៃទី ៣០ ខែឧសភា វេលាម៉ោង ៣ៈ២២នាទីរសៀល (ម៉ោងនៅរដ្ឋផ្លូរីដា) ហើយក្នុងនោះ អវកាសយានិកជើងចាស់ពីររូបគឺលោក Bob Behnken និងលោក Doug Hurley នឹងត្រូវធ្វើដំណើរតាមរយៈយាន Crew Dragon របស់ក្រុមហ៊ុន SpaceX ដោយចំណាយពេលប្រហែល ១៩ម៉ោង ដើម្បីឡើងទៅដល់ទៅកាន់ស្ថានីយ៍អវកាសអន្តរជាតិ (ISS)។ ទន្ទឹមគ្នានេះដែរ SpaceX ក៏នៅតែសង្ឃឹមយ៉ាងមុតមាំថា ខ្លួននឹងក្លាយជាក្រុមហ៊ុនឯកជនដំបូងគេ ដែលអាចបញ្ជូនមនុស្សឡើងនៅទីអវកាសបានជោគជ័យ៕