ក្រសួងសាធារណការ និងដឹកជញ្ជូននៅថ្ងៃ ១៣ ឧសភាកន្លងនេះ បានបញ្ជាក់ថា អាយុអ្នកបើកបរត្រូវកំណត់តាមប្រភេទបណ្ណបើកបរ និងមានអាយុយ៉ាងតិច ១៨ ឆ្នាំ។ ចំណែកអ្នកកាន់បណ្ណបើកបរគ្រប់ប្រភេទមានសិទ្ធិបើកបរយានយន្តបានរហូតដល់អាយុ ៦៥ឆ្នាំ។ ប៉ុន្តែបើលើសពី ៦៥ឆ្នាំឡើងទៅអាចអនុញ្ញាតឲ្យបើកបរបាន លុះត្រាបំពេញលក្ខខណ្ឌដែលអាជ្ញាធរតម្រូវ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រសួងបញ្ជាក់ថា៖ «អ្នកកាន់បណ្ណបើកបរគ្រប់ប្រភេទមានសិទ្ធិបើកបរយានយន្តបានរហូតដល់អាយុ ៦៥ឆ្នាំ។ ចាប់ពីអាយុ ៦៥ឆ្នាំឡើងទៅអាចអនុញ្ញាតឲ្យបើកបរបាន ប៉ុន្តែត្រូវពិនិត្យសុខភាព និងប្តូរបណ្ណបើកបរដែលមានសុពលភាពរយៈពេល ២ឆ្នាំម្តង»។
ចំពោះសុពលភាពបណ្ណបើកបរ ក្រសួងបន្ថែមថា៖
· បណ្ណបើកបរប្រភេទ «ក» និង«ខ» មានសុពលភាព ១០ឆ្នាំ
· បណ្ណបើកបរប្រភេទ «គ» «ឃ» និង«ង» មានសុពលភាព ៥ឆ្នាំ
លើសពីនេះក្រសួងសាធារណការបន្តថាអ្នកកាន់បណ្ណបើកបរ ត្រូវសុំប្តូរបណ្ណបើកបរមុនអស់សុពលភាព ដោយភ្ជាប់មកជាមួយនូវលិខិតពិនិត្យសុខភាពដែលបញ្ជាក់ថា អាចបើកបរបាន។ ការមិនបានមកប្តូរបណ្ណបើកបរថ្មី ត្រូវទទួលការពិន័យស្របតាមបទបញ្ញត្តិនៃច្បាប់នេះ។
· ចំពោះអាយុអ្នកបើកបរ
អាយុអ្នកបើកបរត្រូវកំណត់តាមប្រភេទបណ្ណបើកបរ៖
1. អាយុ ១៨ឆ្នាំយ៉ាងតិច ចំពោះប្រភេទ «ក» និង«ខ»
2. អាយុ ២២ឆ្នាំយ៉ាងតិច ចំពោះប្រភេទ «គ» និង«ឃ១»
3. អាយុ ២៤ឆ្នាំយ៉ាងតិច ចំពោះប្រភេទ«ឃ២» និង«ង»៕