សហរដ្ឋអាមេរិក៖ វេជ្ជបណ្ឌិតដែលបានព្យាបាលអ្នកជំងឺកូវីដ១៩ដំបូងគេនៅសហរដ្ឋអាមេរិកបាននិយាយថា គាត់ខ្លាចនៅពេលជំងឺនេះផ្ទុះជាលើកទីពីរទៀត ខណៈពេលដែលមិនដឹងថា ប្រទេសនេះអាចមានអ្វីគ្រប់គ្រាន់ក្នុងការទប់ស្កាត់ជំងឺនេះម្តងទៀតឬអត់ទេ។ នេះបើយោងទៅតាមសេចក្តីរាយការណ៍របស់សារព័ត៌មាន Daily Mail។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សវេជ្ជបណ្ឌិតម្នាក់នេះមានឈ្មោះថា Dr. George Diaz បានព្យាបាលអ្នកជំងឺកូវីដ១៩របស់គាត់ដំបូងគេ ដែលត្រូវបានរកឃើញច្បាស់ក្នុងខែមករាកន្លងនេះ ក្នុងទីក្រុងវ៉ាស៊ីនតោន ហើយបានប្រើប្រាស់ថ្នាំ Remdesivir ដែលជាថ្នាំប្រឆាំងនឹងវីរុស ព្រមទាំងទទួលស្គាល់ដោយប្រទេសអាមេរិកផ្ទាល់ក្នុងការប្រើប្រាស់លក្ខណៈបន្ទាន់ផងដែរ។ ថ្វីបើថ្នាំនេះទទួលបានជោគជ័យក្នុងការព្យាបាលជំងឺក៏ដោយ តែវេជ្ជបណ្ឌិតខាងលើនេះបានបន្ថែមថា ការនៅដាច់ដោយឡែកពីគេនៅតែជាវិធីព្យាបាលដ៏មានប្រសិទ្ធភាពបំផុត ហើយគាត់ក៏បារម្ភថា៖ «នៅពេលសេដ្ឋកិច្ចបើកឲ្យដំណើរការវិញ យើងនឹងជួបជំងឺនេះផ្ទុះឡើងវិញជាលើកទីពីរ ហើយក៏ធំដូចលើកទីមួយដែរ»។
វេជ្ជបណ្ឌិត Diaz បានបន្ថែមទៀតថា ដោយសារតែការបង្កើតវ៉ាក់សាំងកំពុងតែធ្វើនៅឡើយ តែថ្នាំ Remedesivir ឃើញថា ដើរតួនាទីមួយក្នុងការទប់ស្កាត់វីរុស ប៉ុន្តែវាក៏ត្រូវតែប្រើប្រាស់ឲ្យបានទូលំទូលាយដែរ។ សូមបញ្ជាក់ថា មកដល់សព្វថ្ងៃនេះ ចំនួនអ្នកស្លាប់ និងអ្នកឆ្លងជំងឺកូវីដ១៩ មានការកើនឡើងខ្លាំងជាងគេក្នុងសហរដ្ឋអាមេរិក ដោយស្ថិតិទាំងនោះបានវ៉ាដាច់ប្រទេសចិនទាំងស្រុងដែលជាទីតាំងកើតជំងឺនេះដំបូងគេទៀតផង៕