ភូមិមួយកំពុងល្បីល្បាញ ដោយសារតែរយៈពេល១០ឆ្នាំហើយ ទើបតែមានកូនប្រុសចាប់កំណើត

ប៉ូឡូញ៖ ភូមិដ៏តូចមួយឈ្មោះថា មីជេស្ស អ៊ូហ្សេនស្គី ភាគខាងត្បូងនៃប្រទេសប៊ូឡូញ ដែលមានប្រជាជនរស់នៅត្រឹមតែ៣០០នាក់ប៉ុណ្ណោះ បានធ្វើឲ្យពិភពលោកភ្ញាក់ផ្អើលជាខ្លាំងកាលពីឆ្នាំមុន បន្ទាប់ពីមានសារព័ត៌មានចុះផ្សាយថា មេភូមិប្រកាសផ្ដល់រង្វាន់ទៅដល់គូស្វាមីភរិយាដំបូងណា ដែលសម្រាលបានកូនប្រុស។

យ៉ាងណាមិញ អស់រយៈពេល១០ឆ្នាំមកទល់ពេលនេះ ទីបំផុតនារីម្នាក់ឈ្មោះថា អ៊េនណា មីឡេក មកពីភូមិខាងលើ បានសម្រាលកូនប្រុសម្នាក់ កាលពីថ្ងៃទី២ ខែឧសភាកន្លងទៅ ដែលធ្វើឲ្យក្នុងភូមិមានភាពត្រេកអរជាខ្លាំង។

ទន្ទឹមនឹងនេះដែរ ស្វាមីរបស់នាង អ៊េនណា ត្រូវបានអ្នកភូមិដាក់រហស្សនាមឲ្យថា «វីរបុរសក្នុងភូមិ» ផងដែរ។ ហើយមេភូមិបាននិយាយថា ការផ្ដល់រង្វាន់នៅតែមានដដែលសម្រាប់គូស្វាមីភរិយាមួយគូនេះ តែមិនទាន់បង្ហើបថា នឹងបានទទួលអ្វីខ្លះឡើយ។

ចំពោះការចាប់កំណើតរបស់ក្មេងប្រុសនេះ បានសង្គ្រោះសហគមជាខ្លាំង ព្រោះក្នុងភូមិមានការធ្លាក់ចុះយ៉ាងខ្លាំងនៃចំនួនប្រជាជន ដោយសារតែនារីៗវ័យក្មេងបានចាកចេញពីភូមិ ដើម្បីស្វែងរកដៃគូជីវិតនៅកន្លែងផ្សេង៕

សូមទស្សនារូបភាពខាងក្រោម៖