ចាប់តាំងពីថ្ងៃ ០១ ឧសភាកន្លងមក មន្ត្រីចរាចរណ៍បានផ្តើមអនុវត្តន៍រឹតបន្តឹងច្បាប់ចរាចរណ៍ផ្លូវគោក ដោយអ្នកបើកបរល្មើសច្បាប់ចរាចរណ៍ត្រូវរងពិន័យទឹកប្រាក់ពី ៣ដងដល់ទៅ ៥ដងទៅតាមបទល្មើស។ ការផាកពិន័យ គឺមិនធ្វើនៅកន្លែងអនុវត្តន៍នោះឡើយ តែត្រូវបញ្ជូនយានយន្តល្មើសទៅកន្លែងធ្វើការរបស់សមត្ថកិច្ចដែលនៅជិតបំផុត និងរក្សាទុក ៣ថ្ងៃសិន ទើបឱ្យម្ចាស់ចូលខ្លួនទៅបង់ប្រាក់ពិន័យតាមច្បាប់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាការកត់សម្គាល់ ត្រឹមរយៈពេល៤ថ្ងៃនៃប្រតិបត្តិការនេះ មានមតិខ្លះចេញមុខសាទរ ខណៈអ្នកមួយចំនួនទៀតបានរិះគន់ឥតសំចៃពីរឿងតម្លើងថ្លៃផាកពិន័យពី ៣ដងដល់ទៅ ៥ដងនៃតម្លៃផាកពិន័យចាស់នេះ។ រិះគន់ឥតសំចៃដោយអ្នកទាំងនោះលើកឡើងថា តាមពិតសមត្ថកិច្ចធ្វើបែបនេះ គឺដោយសារចង់រកលុយ និងថា «ជាឱកាសល្អក្នុងការរឹបរកលុយ ដោយច្របាច់ករាស្រ្ត តូចតាច ក្រីក្រ»។
ក្រោយការរិះគន់ជាបន្តបន្ទាប់បែបនេះ លោកឧត្តមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានបញ្ជាក់ប្រាប់ Khmerload នាថ្ងៃ ០៤ ឧសភានេះថា ក្នុងនាមនគរបាលចរាចរណ៍ផ្លូវគោក និងអគ្គស្នងការដ្ឋាននគរបាលជាតិ លោកសូមបដិសេធ នូវការចោទប្រកាន់បែបនេះ។ លោកថា ការលើកឡើងនោះគឺមិនពិតទាល់តែសោះ ដោយអះអាងថា ប៉ូលីសចរាចរណ៍មិនមែនពិន័យច្រើនជាងមុនដោយសារចង់រឹបរកលុយនោះទេ តែតាមពិតអាជ្ញាធរធ្វើបែបនេះ ដើម្បីទប់ស្កាត់បញ្ហាគ្រោះថ្នាក់ចរាចរណ៍ដែលកើតឡើងជារៀងរាល់ថ្ងៃតែប៉ុណ្ណោះ។
លោកឧត្តមសេនីយ៍ត្រី ថី វិសាល ថា៖ «មន្ត្រីនគរបាលចរាចរណ៍ផ្លូវគោកជាង ៣ពាន់នាក់នៅទូទាំងប្រទេស និងអគ្គស្នងការនគរបាលជាតិ សូមបដិសេធទាំងស្រុងនូវសម្តីដែលថា “ការបន្តឹងច្បាប់ចរាចរណ៍ផ្លូវគោក ដែលតម្លើងពិន័យពី ៣ទៅ ៥ដងនោះ ដោយសាររដ្ឋចង់រឹបរកលុយ”។ សម្តីនេះមិនពិតទេ»។
លោកបន្តថា៖ «តាមពិតគោលដៅចម្បងនៃការអនុវត្តច្បាប់ស្តីពីចរាចរណ៍ផ្លូវគោកនេះ គឺដើម្បីទប់ស្កាត់បញ្ហាគ្រោះថ្នាក់ចរាចរណ៍ដែលកើតឡើង។ មូលហេតុដែលចម្បងដែលឈានដល់ការសម្រេចធ្វើនេះ ធ្វើឡើងដោយយោងតាមស្ថានភាព កាលពី២០១៩ ចំនួនអ្នកស្លាប់កើនជាង២០០នាក់ បើធៀប ២០១៨។ អ៊ឹចឹង បានឆ្នាំ២០២០នេះ អាជ្ញាធររឹតបន្តឹងច្បាប់ជាអាទិភាព ខណៈពីមុនយកការអប់រំជាអាទិភាព តែពលរដ្ឋមិនស្តាប់»។
លោកឧត្តមសេនីយ៍ត្រីរូបនេះបានបន្ថែមថា ស្ថានភាពនៃការបន្តឹងចរាចរណ៍រយៈពេល៤ថ្ងៃនៃដើមខែឧសភានេះ លោក និងក្រុមការងារក៏ពិនិត្យឃើញស្ថានភាពខ្លះគួរឲ្យកត់សម្គាល់ដែរ។ លោកថា អ្នកប្រើប្រាស់ផ្លូវខ្លះសម្តែងនូវក្តីសាទរដែលអាជ្ញាធររឹតបន្តឹងច្បាប់ចរាចរណ៍ ប៉ុន្តែមួយចំនួនតូចទៀតមិនព្រមគោរព ហើយថែមទាំងបន្ទោសរដ្ឋាភិបាលទៀតផង។
«ពលរដ្ឋមួយចំនួនធំសាទរនូវការបន្តឹងច្បាប់នេះ មានតែអ្នកប្រើប្រាស់ផ្លូវមួយចំនួនតូចទេ ដែលមិនព្រមផ្លាស់ប្តូរឥរិយាបថ ដើម្បីមកចូលរួមគោរពច្បាប់ ហើយថែមទាំងបន្ទោសរដ្ឋាភិបាលក្នុងការអនុវត្តច្បាប់ទៅវិញ។ មែនទែនទៅ ការគោរពច្បាប់ធ្វើឲ្យពលរដ្ឋមិនខាតពេល មិនខាតលុយ និងបានចូលរួមជាមួយរដ្ឋដើម្បីកុំឲ្យមានគ្រោះថ្នាក់ចរាចរណ៍ទៀតផង»។
សូមបញ្ជាក់ថា អាជ្ញាធរបានកំណត់យកបទល្មើសចំនួន៧ចំណុច ក្នុងចំណោម ៣៣ ដែលត្រូវត្រួតពិនិត្យមុនគេសម្រាប់ទោចក្រយានយន្ត ត្រីចក្រយានយន្ត ត្រីចក្រយានយន្តសណ្តោងរ៉ឺម៉ក និងម៉ូតូកង់បួន។ ចំណុចល្មើសទាំងនោះរួមមាន មិនពាក់មួកសុវត្ថិភាព,មិនគោរពភ្លើង និងផ្លាកសញ្ញាចរាចរណ៍, ល្មើសក្នុងការបត់ ការវ៉ាជែង, ការដឹកលើសចំណុះ,ស្រវឹង,គ្មានផ្លាកលេខ និងប្រើទូរស័ព្ទពេលបើកបរដោយគ្មានឧបករណ៍ភ្ជាប់សំឡេង។
ចំណែកបទល្មើសរថយន្តមាន៩ ក្នុងចំណោម៤១ ដែលត្រូវត្រួតពិនិត្យ និងចាប់ផាកពិន័យមុនគេ គឺរួមមានល្មើសល្បឿន, ស្រវឹង, គ្មានបណ្ណបើកបរ, មិនគោរពភ្លើងសញ្ញា និងផ្លាកសញ្ញាចរាចរណ៍, ល្មើសក្នុងការបទ និងវ៉ាជែង, មិនពាក់ខ្សែក្រវាត់សុវត្ថិភាព, ដឹកលើសចំណុះ, គ្មានស្លាកលេខ និងប័ណ្ណសម្គាល់យានយន្ត និងនិយាយទូរស័ព្ទពេលបើកបរដោយគ្មានឧបករណ៍ភ្ជាប់សំឡេង៕
Bong I.T