ជំងឺរលាកសួតអាចកើតឡើងដោយសារតែមានការវាយប្រហារដោយវីរុស ផ្សិត ឬបាក់តេរី ចូលទៅក្នុងសួតរបស់យើង។ ពេលនោះវានឹងធ្វើឲ្យថង់ទងសួតតូចៗជាច្រើនទៅជារលាក និងផ្ទុកទៅដោយទឹក ឬខ្ទុះ។ បើសិនជាអ្នកមានសុខភាពល្អ និងព្យាបាលបានត្រឹមត្រូវ វាច្រើនតែមិនបង្កអ្វីគ្រោះថ្នាក់ធ្ងន់ធ្ងរឡើយ។ ប៉ុន្តែវាអាចជារឿងមួយគ្រោះថ្នាក់ចំពោះក្មេងតូចៗ មនុស្សចាស់ និងអ្នកដែលមានប្រព័ន្ធភាពស៊ាំចុះខ្សោយ។ 

ភាគច្រើន រាងកាយរបស់យើងបញ្ចេញ ឬយកឈ្នះមេរោគដែលចូលទៅក្នុងសួតចេញមកខាងក្រៅវិញតាមរយៈការក្អក។ បើសិនជាវាចូលទៅក្នុងខ្លួនយើងមែន ប្រព័ន្ធភាពស៊ាំច្រើនតែសម្លាប់វាចោលមុនពេលបង្កជាជំងឺ។ ប៉ុន្តែបើសិនជាមេរោគនោះខ្លាំង ឬរាងកាយមិនអាចសម្លាប់វាបាន សួតអាចនឹងរងការបង្ករោគ។ នៅពេលប្រព័ន្ធភាពស៊ាំបញ្ជូនភ្នាក់ងារសម្លាប់មេរោគ សួតអាចនឹងរងការរលាក ហើយបង្កជាជំងឺរលាកសួតតែម្តងទៅ។ 

ក្រោយពីឆ្លងជំងឺនេះរួច អ្នកអាចនឹងមានអាការៈ ក្តៅខ្លួនខ្លាំង គ្រុនញាក់ ពិបាកដកដង្ហើម និងឈឺទ្រូងពេលដកដង្ហើម។ អ្នកប្រហែលជាក្អកខ្លាំង និងជាប់រហូត ព្រមទាំងមានស្លេសដ៏ខាប់ទៀតផង។ 

ជំងឺរលាកសួតបង្កដោយបាក់តេរី

មេរោគតូចៗមួយចំនួនគឺជាផ្នែកមួយធម្មតារបស់រាងកាយដូចជាបាក់តេរីក្នុងពោះវៀន ព្រោះវាជាអ្នក ជួយរំលាយអាហារ។ ប៉ុន្តែក្រៅពីនេះគឺអាចធ្វើឲ្យអ្នកមានជំងឺបាន ហើយភាគច្រើនជំងឺរលាកសួតលើមនុស្សធំបង្កឡើងដោយបាក់តេរី។ ហើយកាលណាជំងឺបង្កឡើងដោយបាក់តេរី មានតែការប្រើថ្នាំផ្សះទេទើបអាចសម្លាប់វាបាន។ 

ជំងឺរលាកសួតបង្កឡើងដោយវីរុស

វីរុសបង្កជំងឺផ្តាសាយគឺជាមូលហេតុដ៏ចម្បងមួយក្នុងការបង្កជំងឺរលាកសួតលើមនុស្សធំ ប៉ុន្តែវីរុសទាំងអស់ដែលបង្ករោគក្នុងមាត់ ច្រមុះ បំពង់ក ឬសួតសុទ្ធតែអាចបង្កជំងឺរលាកសួតបានទាំងអស់។ រោគសញ្ញារបស់ជំងឺនេះវិញច្រើនតែស្រាលជាបង្កដោយបាក់តេរី ហើយរាងកាយច្រើនតែប្រឆាំងឈ្នះវាក្នុងរយៈពេល១ ទៅ៣សប្តាហ៍។ 

ជំងឺរលាកសួតបង្កដោយមេរោគផ្សិត

មេរោគផ្សិតកម្រងបង្កជាជំងឺរលាកសួតណាស់ លុះត្រាតែអ្នកជំងឺនោះមានប្រព័ន្ធភាពស៊ាំចុះខ្សោយដោយសារតែប្រើថ្នាំទប់ស្កាត់ប្រព័ន្ធភាពស៊ាំ ឬមានជំងឺអេដស៍។ ទោះបីជាយ៉ាងណាក៏ដោយ ជំងឺនេះអាចព្យាបាលបានដោយការប្រើថ្នាំប្រឆាំងនឹងមេរោគផ្សិត៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]