អាជ្ញាធរខេត្តបាត់ដំបង នារសៀលថ្ងៃ ២០មេសាកន្លងទៅ បានអំពាវនាវឲ្យពលរដ្ឋដែលទៅលេងទឹកអូរ ឬទឹកស្ទឹងនៅភូមិសាស្ត្រស្រុកសំឡូតមានការប្រុងប្រយ័ត្នចំពោះត្រីក្រពត។ ការអំពាវនាវពីសំណាក់អាជ្ញាធរយ៉ាងដូច្នេះបានធ្វើឡើងក្រោយប៉ុន្មានថ្ងៃថ្មីៗនេះ មានករណីពលរដ្ឋដែលទៅលេងនៅភូមិសាស្ត្រខាងលើបានបង្ហោះនៅលើបណ្តាញសង្គមដោយអះអាងថា ពេលពួកគេចុះលេងទឹកនៅស្រុកសំឡូត មានករណីសត្វខាំអស់សាច់ទាំងដុំ មិនដឹងមុខ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបន្ទាប់ពីពិនិត្យឃើញថា ទិដ្ឋភាពខាងលើបានបង្កជាការព្រួយបារម្ភ ភ័យខ្លាច ព្រមទាំងមានការជជែកវែកញែកជាបន្តបន្ទាប់អំពីមូលហេតុនៃបញ្ហានោះ អាជ្ញាធរខេត្តបាត់ដំបងបកស្រាយថា ដើមហេតុគឺបណ្តាលមកពីត្រីក្រពតខាំ។
ជាការកត់សម្គាល់ ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបងនាល្ងាចថ្ងៃ ២១មេសា ម្សិលមិញនេះ បានចេញមុខបំភ្លឺជូនសាធារណ:ជន ទាក់ទិនការបង្ហោះរូបភាព និងខ្លឹមសារព័ត៌មានស្តីពីករណី មានសត្វ(ខាំ)ប្រជាពលរដ្ឋដែលចុះលេងទឹកនៅក្នុងស្ទឹងឬអូរ នៅមូលដ្ឋានខ្លះនៃស្រុកសំឡូត ខេត្តបាត់ដំបង រហូតបណ្តាលឲ្យដាច់សាច់ មានរបួសស្លាកស្នាមលើដៃ ជើង និងខ្លួនប្រាណផងដែរ។
ហើយអាជ្ញាធរបន្ថែមថា ក្រុមការងារខ្លួនបានទាក់ទងទៅលោកវរសេនីយ៍ឯក កោ ស៊ុនកាំង អធិការនគរបាលស្រុកសំឡូត ដើម្បីបំភ្លឺរឿងនេះ។ ហើយជាការឆ្លើយតប លោកអធិការបានឲ្យដឹងថា ករណីខាងលើគឺ បង្កឡើងដោយសត្វកំពត(ត្រីក្រពត)ដែលស្ថិតនៅក្នុងទឹកអូរ ឬទឹកស្ទឹងនៃមូលដ្ឋានខ្លះក្នុងស្រុកសំឡូតខេត្តបាត់ដំបង។ លោកកោ ស៊ុនកាំងបន្ថែមថា បញ្ហានេះពីមុនមកក៏ធ្លាប់កើតមានដែរ ។
គួររំឭកថា ថ្មីៗមានរូបភាពដែលភ្ជាប់ដោយខ្លឹមសារក្នុងបណ្តាញសង្គមជាច្រើនត្រូវបានគេបន្តចែកចាយព្រោងព្រាត ដោយអះអាងថានៅស្រុកសំឡូតមានករណីសត្វខាំអស់សាច់ទាំងដុំ មិនដឹងមុខ នៅពេលអ្នកដើរកម្សាន្ត ចុះលេងទឹកស្ទឹង ឬអូរ ដែលបង្កជាការព្រួយបារម្ភ ភ័យខ្លាច ព្រមទាំងមានការជជែកវែកញែកជាបន្តបន្ទាប់អំពីមូលហេតុនៃករណីខាងលើ។ យ៉ាងណាការងឿងឆ្ងល់ត្រូវបានអាជ្ញាធរខេត្តបាត់ដំបងបកស្រាយថា ជាករណីត្រីក្រពតខាំ៕