ការរាតត្បាតនៃវីរុស COVID-19 បានធ្វើឲ្យមនុស្សជាច្រើនមានអារម្មណ៍ភ័យខ្លាច និងថប់បារម្ភថាខ្លួន និងគ្រួសារអាចឆ្លងវីរុសនេះ។ ទាំងនេះអាចធ្វើឲ្យគេងមិនលក់ ឆាប់ភ្លេច និងឆាប់ខឹង។ ដូចនេះហើយអត្ថបទនេះបង្ហាញពីវិធីខ្លះៗដើម្បីជួយសម្រួលបញ្ហាទាំងនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការគេងមិនលក់
ការថប់បារម្ភអាចធ្វើឲ្យគេងមិនលក់។ លោក Jill Stoddard គ្រូពេទ្យចិត្តសាស្ត្រ និងប្រធានមជ្ឈមណ្ឌលគ្រប់គ្រងស្ត្រេស និងអាការៈថប់បារម្ភបាននិយាយថាមនុស្សភាគច្រើនមានបញ្ហាក្នុងការគេងនៅពេលដែលមានអារម្មណ៍រសាប់រសល់។ ភាគច្រើនអ្នកទាំងនោះភ្ញាក់ពេលយប់ហើយពិបាកក្នុងការត្រលប់ទៅគេងម្ដងទៀត។ ការគេងមិនគ្រប់គ្រាន់អាចធ្វើឲ្យស្ថានភាពអាការៈថប់បារម្ភកាន់តែអាក្រក់ឡើង។
លោក Brandon Peters វេជ្ជបណ្ឌិតផ្នែកសរសៃប្រសាទ និងការគេងបានលើកឡើងថាការគេងឲ្យគ្រប់គ្រាន់អាចជួយសម្រួលដល់អាការៈថប់បារម្ភ។ លោកបានណែនាំឲ្យរក្សាពេលវេលាក្នុងការចូលគេងឲ្យបានទៀងទាត់ កាត់បន្ថយការផឹកគ្រឿងស្រវឹង និងជាតិកាហ្វេអ៊ីន ហាត់ប្រាណ និងទទួលបានពន្លឺថ្ងៃនៅពេលថ្ងៃ។ បន្ថែមពីនេះទៀត រៀបចំបន្ទប់គេងឲ្យងងឹត ស្ងប់ស្ងាត់ និងត្រជាក់ ហើយមុនចូលគេងមិនគួរប្រើប្រាស់ទូរស័ព្ទ ឬគ្រឿងអេឡិចត្រូនិចផ្សេងៗរយៈពេលមួយម៉ោង។ ប្រសិនជាយើងត្រូវការបន្ធូរអារម្មណ៍យើងអាចញ៉ាំអាហារសម្រន់ដូចជាប្រភេទនំស្រួយ ផ្លែចេក គ្រាប់ធញ្ញជាតិជាដើមមុនចូលគេងមួយម៉ោង។
ពិបាកក្នុងការផ្តោតអារម្មណ៍
មនុស្សយើងគឺតែងផ្ដោតអារម្មណ៍ទៅលើការគម្រាមកំហែងណាមួយដូចជាវីរុស COVID-19ដែលគម្រាមកំហែងទៅលើសុខភាព និងការរស់នៅប្រចាំថ្ងៃ។ ដូចនេះធ្វើឲ្យយើងអាន និងមើលព័ត៌មានពីវីរុសនេះច្រើន រួមទាំងគិតរកវិធីផ្សេងៗការពារខ្លួន។ ម៉្យាងទៀតក្នុងអំឡុងពេលវីរុសរាតត្បាតអាចត្រូវធ្វើការពីផ្ទះ ឬរៀនពីផ្ទះ។ លោក Jonathan Abramowitz សាស្ត្រាចារ្យផ្នែកចិត្តសាស្ត្រនៅសាកលវិទ្យាល័យកាលីហ្វ័រញ៉ាបានលើកឡើងថានៅពេលដែលផ្ដោតចំណាប់អារម្មណ៍ច្រើនទៅលើបញ្ហាវីរុសនេះនឹងធ្វើឲ្យើងយកាន់តែពិបាកក្នុងការផ្ដោតអារម្មណ៍ក្នុងធ្វើការងារផ្សេងៗ។
ដើម្បីផ្ដោតអារម្មណ៍ក្នុងការធ្វើការកាន់តែល្អ យើងអាចចាប់ផ្ដើមដោយផ្ដោតទៅលើការងារដែលសំខាន់ និងបន្ទាន់។ យើងអាចកត់ត្រាការងារដែលត្រូវធ្វើនៅថ្ងៃស្អែកដោយបែងចែកតាមភាពសំខាន់ និងភាពបន្ទាន់របស់ការងារទាំងនោះ ហើយរៀបចំពេលវេលាច្បាស់លាស់ ជាពិសេសត្រូវសម្រាករៀងរាល់ ៤៥នាទីម្ដង។
លើសពីនេះ យើងត្រូវកំណត់ការតាមដានព័ត៌មាន រួមទាំងការប្រើប្រាស់បណ្ដាញសង្គមដោយមិនឲ្យលើសពីមួយម៉ោង។ ប្រសិនជាយើងមានបំណងចង់មើលព័ត៌មានខ្លាំងអំឡុងពេលកំពុងធ្វើការងារផ្សេងៗ យើងអាចពន្យារពេលធ្វើការរបស់យើងចំនួន១០នាទី នោះយើងនឹងមិនមានអារម្មណ៍ចង់មើលព័ត៌មានទៀតទេ។
ឆាប់ភ្លេច
មនុស្យយើងមួយចំនួនមានការលំបាកក្នុងការចងចាំព័ត៌មានទាក់ទងទៅនឹងការងារ ឬសន្ទនាទាក់ទងនឹងការងារផ្សេងៗ។ ការសិក្សាមួយបានរកឃើញថាអាការៈថប់បារម្ភមានផលប៉ះពាល់ដល់ការចងចាំ។ លោកស្រី Aleksandra Parpura អ្នកជំនាញផ្នែករោគស្ត្រីបានលើកឡើងថាអ្វីក៏ដោយឲក្យតែអាចជួយយើងបន្ធូរអារម្មណ៍បាន សុទ្ធតែអាចជួយដល់ការចងចាំ។ សកម្មភាពដែលជួយបន្ធូរអារម្មណ៍មានដូចជាហាត់យ៉ូហ្គា ហាត់ប្រាណ និងចំណាយពេលជាមួយធម្មជាតិប្រសិនជាអាច។ ក្រៅពីសកម្មភាពទាំងនេះយើងក៏អាចប្រើប្រាស់វិធីផ្សេងទៀតដែរដូចជាសកម្មភាពដែលទាក់ទងនឹងការផ្ដោតអារម្មណ៍ជាដើម។ សកម្មភាពទាំងនោះអាចជាការលេងព្យាណូ លេងហ្គេម ឬល្បែងប្រាជ្ញាផ្សេងៗ។
ឆាប់ខឹង
ការសិក្សាជាច្រើនបានឲ្យដឹងថាការថប់បារម្ភអាចធ្វើឲ្យយើងឆាប់ខឹង ហើយការឆាប់ខឹងនេះអាចប៉ះពាល់ដល់ទំនាក់ទំនងរបស់យើងជាមួយនឹងគ្រួសារ ក៏ដូចជាអ្នកធ្វើការជាមួយ។ ជំហានដំបូងក្នុងការបង្ការអាការៈថប់បារម្ភកុំឲ្យប៉ះពាល់ដល់ទំនាក់ទំនងរបស់យើងគឺត្រូវដឹងថាយើងមានអាការៈថប់បារម្ភមុននឹងក្លាយជាកំហឹង។ នៅពេលយើងដឹងថាអ្នកមានអាការៈនេះ យើងអាចនៅឲ្យឆ្ងាយពីអ្នកដទៃ និងរំងាប់អារម្មណ៍ ឬយើងអាចពិភាក្សាពីបញ្ហានេះជាមួយអ្នកជុំវិញខ្លួន។ ម៉្យាងទៀត យើងគួរបន្ធូរអារម្មណ៍ដោយព្យាយាមដកដង្ហើមវែងៗ ឬស្រមៃមើលទីកន្លែងដែលស្ងប់ស្ងាត់ ឬកន្លែងស្អាតៗដែលយើងធ្លាប់បានទៅកំសាន្ត។ យើងក៏អាចហាត់ប្រាណដោយរត់ចុះឡើងជណ្ដើរដើម្បីកាត់បន្ថយថាមពលលើសដែលជាលក្ខណៈមួយនៃអាការៈថប់បារម្ភ និងកំហឹង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet