ផ្អើលពេញរថភ្លើង! បន្ទាប់ពីអ្នកដំណើរមានផ្ទុកជម្ងឺ កូវីដ-១៩ ម្នាក់បានស្លាប់នៅលើរថភ្លើង

ថៃ៖ មន្ត្រីម្នាក់បាននិយាយកាលពីថ្ងៃពុធថា សាកសពរបស់អ្នកដំណើរអាយុ ៥៧ ឆ្នាំម្នាក់ដែលបាន ដួល និងស្លាប់នៅលើរថភ្លើងល្បឿនលឿនពិសេសនៅភាគខាងត្បូងក្នុងស្រុក Thap Sakae កាលពី យប់ថ្ងៃចន្ទ បានធ្វើតេស្តវិជ្ជមានសម្រាប់ជម្ងឺ Covid-១៩។

លោក Voravuth Mala អភិបាលរងទទួលបន្ទុកផ្នែកផ្លូវដែករបស់ប្រទេសថៃ (SRT) បាននិយាយនៅលើទំព័រហ្វេសប៊ុក SRT ថាការធ្វើតេស្តវិជ្ជមានត្រូវបានបញ្ជាក់ ដោយការិយាល័យសុខាភិបាល សាធារណៈខេត្ត Songkhla។

SRT មិនបានប្រាប់ឈ្មោះអ្នកដំណើរនោះទេ ប៉ុន្តែប្រព័ន្ធផ្សព្វផ្សាយថៃបានរាយការណ៍ថា ឈ្មោះរបស់គាត់គឺ Anant Sahor អាយុ ៥៧ ឆ្នាំមកពីខេត្ត Narathiwat។ លោកអភិបាលរងនៃ SRT បាននិយាយថាអ្នកដំណើរបានទិញសំបុត្រសម្រាប់ទូរថភ្លើង ដែលបំពាក់ដោយម៉ាស៊ីនត្រជាក់លំដាប់ទី ២ នៅលើរថភ្លើងល្បឿនលឿនថាក់ស៊ីនលេខ ៣៧ ដែលប្រតិបត្តិការនៅចន្លោះទីក្រុងបាងកក និង ហាតយ៉ៃកាលពីថ្ងៃទី ៣០ ខែមីនា។

បុរសនោះចាប់ផ្តើមក្អកនិងក្អួតក្នុងពេលធ្វើដំណើរ។ ស្ថានភាពរបស់គាត់បានប្រសើរឡើង នៅពេលរថភ្លើងទៅដល់ស្ថានីយ៍រថភ្លើងហួហ៊ីន ហើយក្រុមមន្ត្រីជំនាញមកពីសាលាក្រុងហួហ៊ីន បានពិនិត្យសីតុណ្ហភាពរាងកាយរបស់គាត់គឺនៅ ៣៦ អង្សាសេ។ ក្រុមមន្រ្តីបានណែនាំឲ្យអ្នកដំណើរសម្រាកនៅស្ថានីយ៍ហួហ៊ីន ប៉ុន្តែគាត់បានទទូចឲ្យបន្តដំណើររបស់គាត់។

នៅម៉ោងប្រហែល ១០ និង ១៥ នាទីបុគ្គលិករថភ្លើងបានប្រទះឃើញអ្នកដំណើរដួលនៅខាងមុខបង្គន់។ នៅពេលរថភ្លើងទៅដល់ស្ថានីយ៍រថភ្លើង Thap Sakae ក្រុមជួយសង្គ្រោះក្នុងតំបន់បានឡើង លើរថភ្លើង ហើយបាននាំបុរសនោះទៅកាន់មន្ទីរពេទ្យ Thap Sakae ជាកន្លែងដែលគាត់ត្រូវបានប្រកាសថាស្លាប់ភ្លាមៗបន្ទាប់ពីពាក់កណ្តាលអធ្រាត្រ។

គាត់បានទទួលរងគ្រោះថ្នាក់ពីជម្ងឺទឹកនោមផ្អែម ប៉ុន្តែសំណាកសាកសព្វគាត់ត្រូវបានគេបញ្ជូនទៅ ធ្វើតេស្តរកជម្ងឺ Covid-១៩ ដែលក្រោយមករកឃើញវិជ្ជមាននៅថ្ងៃពុធ។

SRT បានបញ្ជូនបញ្ជីឈ្មោះអ្នកដំណើរចំនួន ១៥ នាក់ដែលជិះនៅលើទូរថភ្លើងដឹកអ្នកដំណើរ ដូចគ្នានឹងអ្នកស្លាប់ទៅការិយាល័យសុខាភិបាលសាធារណៈ Songkhla និងបានដាក់មនុស្សចំនួន ១១ នាក់ឲ្យនៅដាច់ដោយឡែកក្នុងនោះមាន៖ បុគ្គលិករថភ្លើងចំនួន ២ នាក់នៅស្ថានីយ៍រថភ្លើង Bang Sue, សន្តិសុខយាមបុគ្គលិករថភ្លើង ៧ នាក់ដែលធ្វើការលើរថភ្លើងល្បឿនលឿន និងមន្ត្រីប៉ូលីសផ្លូវដែកម្នាក់ នេះបើយោងតាមសម្ដីលោក Voravuth។

លោកវេជ្ជបណ្ឌិត Suriya Khuharat ប្រធានការិយាល័យសុខភាពសាធារណៈ Prachuap Khiri Khan បាននិយាយនៅថ្ងៃពុធនេះថា អ្នកដំណើរទើបតែត្រឡប់មកពីប្រទេសប៉ាគីស្ថានទៅកាន់អាកាសយានដ្ឋានសុវណ្ណភូមិ។ គាត់បានធ្វើការពិនិត្យនៅអាកាសយានដ្ឋាន ប៉ុន្តែមិនត្រូវបានគេរកឃើញថាមានគ្រុនក្តៅទេ។

អភិបាលខេត្ត Prachuap Khiri Khan លោក Pallop Singhasenee បាននិយាយថា Anant គឺជាករណីឆ្លងមេរោគ Covid-១៩ ទី ១៣ នៅក្នុងខេត្តនេះ ប៉ុន្តែជាករណីទី ១ ដែលបានស្លាប់៕