អ៊ីតាលី៖ អាជ្ញាធរអ៊ីតាលីទើបតែបានឲ្យដឹងថា អ្នកជំងឺម្នាក់មានវ័យរហូតដល់១០១ឆ្នាំ ត្រូវបានអនុញ្ញាត​ឲ្យចាកចេញ​ពីមន្ទីរពេទ្យ បន្ទាប់ពីគាត់ជាសះស្បើយឡើងវិញទាំងស្រុងពីជំងឺ COVID-19 ដែលមកទល់ពេលនេះ បានផ្តាច់​ជីវិតមនុស្សជាង៨ពាន់នាក់ នៅក្នុងប្រទេសអ៉ីតាលី ជាពិសេសក្នុងចំណោមមនុស្សវ័យចំណាស់ៗតែម្តង។ នេះបើតាមការដកស្រង់ការផ្សាយពីសារព័ត៌មាន CNN នៅថ្ងៃសុក្រ ទី២៧ ខែមីនា ឆ្នាំ២០២០។

យោងតាមអាជ្ញាធរទីក្រុង Rimina របស់អ៉ីតាលី លោកតាដ៏ចំណាស់ខាងលើ ដែលត្រូវគេបង្ហើបឲ្យដឹងត្រឹមឈ្មោះថា Mr. P បាន ចូលស្នាក់នៅព្យាបាលក្នុងមន្ទីរពេទ្យនៃទីក្រុងនេះ ដែលស្ថិតនៅភាគឦសានប្រទេសអ៉ីតាលី កាលពី​សប្តាហ៍មុន ក្រោយពីគាត់ ត្រូវបានធ្វើតេស្តរកឃើញ COVID-19។ គាត់បានចាកចេញពីមន្ទីរពេទ្យត្រឡប់ទៅផ្ទះវិញ កាលពីថ្ងៃព្រហស្បតិ៍ម្សិលមិញ។

កាលពីប៉ុន្មានថ្ងៃមុន លោកយាយម្នាក់អាយុ៩៥ឆ្នាំ ក៏បានជាសះស្បើយពីជំងឺ COVID-19 នៅអ៉ីតាលីផងដែរ ដោយគាត់នៅទីក្រុង Modena។ ដោយឡែកសម្រាប់ ការផ្ទុះរាលដាលនៃ COVID-19 នាពេលបច្ចុប្បន្ន អ៉ីតាលី​គឺជាប្រទេសដែលមានអ្នកស្លាប់ច្រើនជាងគេ រហូតដល់ជាង៨,២០០នាក់ ហើយមានករណីឆ្លងលើសពី​៨០,០០០នាក់។

គួរជម្រាបថា អ្វីដែលគួរឲ្យកត់សម្គាល់ផងដែរនោះ គឺលោកតា Mr. P បានកើតនៅឆ្នាំ១៩១៩ ចំពេលដែល​មាន​ការផ្ទុះរាតត្បាតនៃ ជំងឺឆ្លង Spanish flu ដ៏កាចសាហាវ ដែលបានសម្លាប់មនុស្សចន្លោះ៣០-៥០លាននាក់ នៅ​ជុំវិញពិភពលោក៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ