លោក Matthew Robinson ដែលជាអ្នកដឹកនាំភាពយន្តដ៏ល្បីឈ្មោះមួយរូបនៃចក្រភពអង់គ្លេស និងត្រូវបានគេស្គាល់ផងដែរថា ជាអ្នកដឹកនាំភាពយន្ត «រសជាតិជីវិត» ដ៏ល្បីនៅកម្ពុជាបានឧបត្ថម្ភទឹកប្រាប់ចំនួន ៥០០០ ដុល្លារទៅដល់រដ្ឋាភិបាលកម្ពុជាដើម្បីទប់ស្កាត់ការរាលដាលវីរុសកូវីដ១៩នៅកម្ពុជា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងលិខិតមួយដែលបានចេញកាលពីថ្ងៃម្សិលមិញ (២៦ មីនា) សម្តេចនាយករដ្ឋមន្រ្តីហ៊ុន សែន បានថ្លែងអំណរគុណដល់លោក Robinson ចំពោះការរួមចំណែករបស់លោកបែបនេះ។
សម្តេចបានបញ្ជាក់នៅក្នុងលិខិតថា៖ «ក្នុងស្មារតីនេះ រដ្ឋាភិបាលសូមថ្លែងអំណរគុណ និងកោតសរសើរដោយស្មោះចំពោះលោកដែលបានបរិច្ចាគនូវជំនួយជាថវិកាចំនួន ៥០០០ ដុល្លារអាមេរិក ជូនដល់រដ្ឋាភិបាលសម្រាប់ប្រយុទ្ធប្រឆាំងនឹងជំងឺដ៏កាចសាហាវមួយនេះ ជាកិច្ចបំពេញកាតព្វកិច្ចការពារ និងសង្គ្រោះសុខភាព និងជីវិតប្រជាជនកម្ពុជា»។
ជាមួយគ្នានេះដែរ លោក Matthew Robinson បានប្រាប់ Khmerload ថា ការឧបត្ថម្ភនេះគឺជារឿងតិចតួចបំផុតដែលលោកអាចធ្វើបានសម្រាប់ជាការរួមចំណែកទៅដល់កម្ពុជា ដែលលោកចាត់ទុកជា «ផ្ទះទី២» របស់លោក ស្របពេលដែលផលិតកម្មខ្មែរមេគង្គរបស់លោក កំពុងតែបាត់បង់ចំណូល ដោយសារតែការរំខាននៃវីរុសកូវីដ១៩នេះ។
លោកបាននិយាយថា៖ «ខ្ញុំសង្ឃឹមថា ស្ថានភាពនឹងអាចវិលទៅរកសភាពដើមវិញយ៉ាងឆាប់រហ័ស។ ខ្ញុំពិតជាជឿជាក់ទៅលើការដឹកនាំរបស់លោកនាយករដ្ឋមន្ត្រីហ៊ុន សែន ក្នុងការជួយឲ្យកម្ពុជាឲ្យចេញផុតពីស្ថានភាពដ៏លំបាកនេះ»។
លោក Robinson បន្តទៀតថា៖ «នៅពេលនេះ នៅក្នុងកម្ពុជា ខ្ញុំមានអារម្មណ៍ថាមានសុវត្ថិភាពជាជាងនៅក្នុងប្រទេសកំណើតរបស់ខ្ញុំទៅទៀត»។
សូមបញ្ជាក់ថា លោក Matthew Robinson បានកសាងកេរ្តិ៍ឈ្មោះនៅចក្រភពអង់គ្លេសរួចទៅហើយ ក្នុងនាមជាផលិតករភាពយន្តដែលទទួលបានពានរង្វាន់នៃទូរទស្សន៍ BBC។ នៅឆ្នាំ២០០៣ ផលិតករភាពយន្តវ័យ ៧៥ឆ្នាំរូបនេះ បានក្លាយទៅជាអ្នកដឹកនាំផលិតភាពយន្តភាគទូរទស្សន៍ដ៏ល្បីជាងគេមួយក្នុងប្រវត្តិសាស្រ្តភាពយន្នកម្ពុជា គឺរឿង «រសជាតិជីវិត»។
នៅឆ្នាំ២០០៦ នៅពេលដែលភាពយន្តរសជាតិជីវិតត្រូវបានបញ្ចប់ជាស្ថាពរ លោក Robinson បានសម្រេចចិត្តតាំងទីលំនៅ នៅកម្ពុជាជាអចិន្រៃយ៍ដោយសារទឹកចិត្តស្រលាញ់ប្រទេសនេះ ក៏ដូចជាប្រជាជនកម្ពុជា។
គិតមកដល់ពេលនេះ ផលិតកម្មខ្មែរមេគង្គរបស់លោក បានផលិតស្នាដៃដ៏គួរឲ្យកត់សម្គាល់ជាច្រើន ជាពិសេសគឺរឿងបាត់ខ្លួន (២០០៩) និងរឿងតម្លៃស្នេហ៍ (២០១៦) ដែលបានឈ្នះពានរង្វាន់ជាច្រើន៕
Bong I.T